काठमाडौं : आगामी असोज ३ गते संविधान दिवसको दिनदेखि प्रदर्शनमा आउन लागेको फिल्म ‘खुस्मा’का दुई नयाँ पोस्टरहरु सार्वजनिक गरिएको छ। निर्माण टिमले आइतबार दुई नयाँ  फरकफरक पोस्टरहरु सार्वजनिक गरेको हो।

एउटा पोस्टरमा अभिनेत्री उपासना सिंह ठकुरी फिचर्ड छिन्। जहाँ उनलाई दु:खी अवस्थामा देख्न सकिन्छ। कसैलाई पर्खेर आँखाबाट आँसु झार्दै, पछ्यौरा ओढेर कुरिरहेकी छिन् उपासना। मनको पीडा लुकाएर जिउन बाध्य रहेको अवस्थामा छिन् उनी।

त्यस्तै अर्को पोस्टरमा भने उपासनासँगै फिल्मका अभिनेता धिरज मगरलाई पनि प्रस्तुत गरिएको छ। जहाँ धिरजको अंगालोमा छिन् उपासना। धिरज र उपासना रोमान्टिक मुडमा रहेका छन्। पोस्टरमा धिरज र उपासनाको निकै गजबको केमिस्ट्री पनि देखिएको छ। यि आकर्षक पोस्टरका डिजाइनर ट्राइडेन्ट कन्सेप्टका रोयल भिमसेन हुन्।

अशोक थापा मगरको कथा र निर्देशन रहेको यो फिल्म रुकुमका विभिन्न आकर्षक स्थानमा खिचिएको हो। फिल्मलाई दिपक बज्राचार्यले खिचेका हुन्। एम मिडिया प्रोडक्सनको ब्यानरमा निर्माण भएको फिल्ममा वीर बहादुर लामा, चन्द्र बहादुर भट्टचन, बेतान मगर, मान बहादुर धनाह मगर र सुस्मिता बुढाथोकी निर्माताको रुपमा रहेका छन्।

मगर समुदायको पृष्ठभूमिको कथालाई फिल्ममा उतारिएको छ। धीरज र उपासनाका अलावा फिल्ममा माओत्से गुरुङ, खड्क बहादुर पुन (खबपु), सुजाता राई, राज थापा काउचा लगायतका कलाकारहरुको पनि अभिनय रहेको छ।