नेपालगन्ज : यस् वर्ष निकै आशा गरिएको र प्रतीक्षा गरिएको फिल्म हो ‘ह्रस्व दीर्घ’। चन्द्र पन्त निर्देशित फिल्म रिलिज हुन अब जम्मा १ हप्ता मात्र बाँकी छ। आगामी कार्तिक ३० गतेदेखि फिल्म विश्वभर एकसाथ प्रदर्शन हुँदैछ।

प्रदर्शन मिति नजिकिँदै गर्दा फिल्म टिम भने प्रचारप्रसारमा निकै व्यस्त छ। बुधबार फिल्मको ट्रेलरसमेत सार्वजनिक गरियो। जुन ट्रेलरलाई यतिबेला निकै छोटो समयमै युट्युबमा १५ लाखबढी पटक हेरिएको छ। प्रतिक्रिया पनि निकै सकारात्मक छन्। यता निर्माण टिमले भने देशभर विभिन्न तरिकाले फिल्मको प्रचारप्रसार गर्न सुरु गरेको छ।

शुक्रबार मात्रै नेपालगन्जमा करिब ७० बढी अटोरिक्सामा पोस्टर टाँस्दै प्रचारप्रसार सुरु गरियो। रिक्साको पछाडि फिल्मको पोस्टर टाँस्नुका साथै रिक्सा चालकहरुलाई फिल्मको टिसर्टसमेत लगाउन दिइएको छ। जसले गर्दा रोड टु रोड पब्लिसिटी हुने अपेक्षा गरिएको छ।

नीता ढुंगानाको निर्माणमा तयार भएको फिल्ममा हरिहर अधिकारीको कथा छ। हरिहर अधिकारी, नीता ढुंगाना अधिकारी, प्रदीप राउत, ब्रम्मानन्दम, विपना थापा, सुनिल वर्मा, मोहमद वली, कविर दुहान, रेखा थापा, सरोज खनाल, संचिता लुइँटेल, किरण केसी, रविन्द्र झा, वुद्दि तामाङ, निर्मल शर्मा लगायतका कलाकारहरुको फिल्ममा अभिनय रहेको छ।