नेपाली चलचित्र क्षेत्रमा नातावाद र समुहवादको विषयमा बहस भइरहँदा चलचित्र ‘अनुराग’ बाट अभिनेत्रीको रुपमा डेब्यू गरेकी पत्रकार ऋषि धमलाकी श्रीमती एलिजा गौतमले नेपाली चलचित्र क्षेत्र नातावाद र समुहवादको घेराबन्दीमा रहेको बताएकी छन् । प्रतिभावान व्यक्तिलाई भन्दा आफ्ना भाइ-भतिजालाई अवसर दिने प्रवृति चलचित्र क्षेत्रमा व्याप्त रहेको उनको भनाई छ ।

‘अनुराग’ मा आफूले नयाँ प्रतिभालाई अवसर दिएको बताउँदै उनले भनेकी छन्, ‘मैले अडिसनबाटै हिरो लिए पनि दुःख गरेर आएको नयाँ मान्छेलाई ल्याएको हुँ । मैले ठूलो रिक्स मोलेको थिएँ । अरु कसले मोल्न सक्छ त्यस्तो रिक्स ? म अरु जस्तो नाटक गरेर आफ्नो गर्लफ्रेण्ड र ब्वाईफ्रेण्ड झार्दिनँ ।’ आफ्नो पहिलो चलचित्र असफल नभए पनि हिम्मत नहारेको उनको भनाई छ ।

उनले आफू पनि नेपोटिज्म र ग्रुपिज्मको शिकार भएको खुलाएकी छन् । आफू विवाहित भएकै कारण कति चलचित्रबाट निकालिएको उनी सुनाउँछिन् । एलिजाले हालै एक अन्तर्वार्तामा भनेकी छन्, ‘मलाई राम्रो चलचित्रबाट अफर आएको छ भने रातारात त्यहाँ हिरोइन परिवर्तन भइहाल्छ । किनकि, म त विवाहित हुँ । यस्तो कति चलचित्रमा भएको छ । तर, नाम चाहिँ लिन्नँ ।’

नेपोटिज्म र ग्रुपिज्म चलचित्र क्षेत्रमा मात्र नभएर हरेक क्षेत्रमा रहेको उनी बताउँछिन् । आर्थिक अवस्था कमजोर भएका, नयाँ कलाकार र प्रतिभावान व्यक्तिलाई चलचित्र वा भिडियोमा अवसर दिन एलिजाको निर्माता तथा निर्देशकलाई आग्रह छ । आफ्नै भाइ-भजितालाई मात्र आश्रय दिने हो भने नेपाली चलचित्र क्षेत्र चाँडै बलिउडमा जस्तो कपूर र खानको मात्र हुने उनको तर्क छ ।