काठमाडौं : सिमोस सुनुवारको निर्देशनमा निर्माण हुन लागेको फिल्म ‘जन्ते बाख्रो’को फर्स्टलुक पोस्टर रिलिज गरिएको छ। निर्माण टिमले मंगलबार फर्स्टलुक पोस्टर रिलिज गरेको हो। रिलिज गरिएको पोस्टरमा खसीलाई चस्मा लगाएको अवस्थामा देख्न सकिन्छ।
त्यसो त, चर्को घाममा छाता ओढेको अवस्थामा छ खसी। पोस्टरले एक खालको कतुहलता पैदा गरेको छ। नौलो र आकर्षक लाग्ने पोस्टरको डिजान रोयल भिमसेन (ट्राइडेन्ट कन्सेप्ट)ले गरेका हुन्।
मुईन इन्टरटेन्मेन्टको ब्यानरमा निर्माण हुन लागेको फिल्ममा प्रदीप भारद्वाजको कथा रहनेछ। फिल्ममा सन्तोष गौतम निर्माताको रुपमा रहेको छ। अब छिट्टै छायांकनमा जान लागेको फिल्ममा अहिलेसम्म अभिनेता सौगात मल्ल मुख्य भुमिकामा अनुबन्धित भइसकेका छन्।
अन्य मुख्य कलाकारहरु चाहिँ अडिसनबाट छनोट गरिने निर्माण टिमले जनाएको छ। निर्माण टिम छिट्टै अडिसन खुलाउने तयारीमा रहेको छ।
