काठमाडौं : घनश्याम लामिछाने निर्देशित फिल्म ‘लन्डन टु पेरिस’को टिजर रिलिज गरिएको छ। ओएसआर डिजिटलको युट्युब च्यानलबाट १ मिनेट ५८ सेकेन्डको टिजर शुक्रबार रिलिज गरिएको हो।

टिजरमा अभिनेत्री साम्राज्ञी आरएल शाह र नव अभिनेता निश्चल खड्कालाई बढी स्पेस दिइएको छ। साम्राज्ञी र निश्चलबीचको प्रेम, रोनान्स र वियोगलाई टिजरमा देखाइएको छ। बोल्ड अवतारमा देखिएकी छिन् साम्राज्ञी। निश्चल र साम्राज्ञीको जोडी गजब तरिकाले जमेको छ।

उसो त, टिजरमा नव अभिनेत्री गरिमा शर्मा र कविर खड्काको जोडीलाई पनि देखाइएको छ। गरिमा र कविरको दृश्य मात्र छ टिजरमा संवाद भने छैन। निश्चल, गरिमा र कविरको यो डेव्यू फिल्म हो। डेव्यू फिल्म भएपनि निश्चलले अब्बल अभिनय गरेका छन्। उनको डायलग डेलिभेरी उत्कृष्ट छ टिजरमा।

प्रदीप भारद्वाजको कथा रहेको फिल्म आगामी जेठ २५ गतेदेखि प्रदर्शनमा आउँदैछ। फिल्मका निर्माता अमित बस्नेत हुन्। साम्राज्ञी आरएल शाह, निश्चल खड्का, गरिमा शर्मा, कविर खड्का, मनिष गान्धी, मनिष श्रेष्ठ, लोक विक्रम मल्ल लगायतका कलाकारहरुको फिल्ममा अभिनय रहेको छ।

एबि इन्टरनेशनलको व्यानरमा यो फिल्म निर्माण भएको हो। नेपालमा फिल्मको वितरण आरआर फिल्म्सले गर्दैछ। अभेद पराव र कुनाल कदलले खिचेको फिल्मलाई साजु चन्द्रनले सम्पादन गरेका हुन्।