राजनीतिज्ञपछि सबैभन्दा बढी ताली र गाली पाउनेमा कलाकार पर्छन् । सम्भवतः नेपालमा कोही यस्ता कलाकार छैनन्, जसले ताली मात्र पाएका हुन् । कलाकारिता क्षेत्रको हिस्सा भएपछि सकारात्मक र नकारात्मक दुवैखाले प्रतिक्रियालाई आत्मसात् गरेर अगाडि बढ्ने हिम्मत राख्नुपर्छ । ताली पाउँदा मात्तिने र गाली आउँदा आत्तिने कलाकार लामो रेसको घोडा बन्न सक्दैन ।

लकडाउनमा सबैभन्दा बढी ताली र गाली नेपाली कलाकारहरुको भयो । हप्तैपिच्छे कलाकारको विवादले फिल्म क्षेत्र तातिरहेको छ । गएको पाँच महिनामा फिल्म क्षेत्रमा जति पनि विवाद भए, त्यसको मुख्य जड कलाकारहरुले विना तयारी र जानकारी नै नभएको विषयमा सञ्चारमाध्यममा आफ्नो भनाई राख्नुलाई देखिन्छ ।

यद्यपि, यसले उनीहरुलाई ठूलो पाठ भने सिकाएको छ । लकडाउनमा एकपछि अर्का कलाकार विवादमा परिरहेको अवस्थामा अभिनेत्री आँचल शर्मा भने आफूलाई लिएर हुने नकारात्मक टिप्पणी र ट्र्रोललाई कसरी ह्यान्डल गर्छिन् ? इन्स्टाग्राममा आफ्ना एक प्रशंसकको प्रश्नमा उनले लेखेकी छन्, ‘हामी सबै अलग-अलग विचार भएका अलग-अलग व्यक्ति हौं ।

सबैलाई सबै थोक राम्रो लाग्छ भन्ने छैन । यहाँ सबैलाई खुसी पार्न गाह्रो छ ।’ विवाहपछि आँचलको अनुहारमा चमक आएको चर्चा हुने गरेको छ । यो कुरा उनी स्वयंले पनि महशुस गरेकी छन् । विवाह अगाडि छोटा कपडा लगाउन संकोच लाग्ने गरेको तर विवाहपछि आफूलाई कुनै प्रकारको डर नभएको उनले बताउने गरेकी छन् । विवाहभन्दा अगाडि फिल्म ‘झिँगेदाउ’ को छायांकन सकेकी उनले लकडाउन खुलेपछि केही भिडियोमा काम गरेकी थिइन् ।