फिल्म ‘ए मेरो हजुर २’ बाट सुखद डेब्यू गरेका सलिनमान बनियाँलाई भिन्न हेयर स्टाइल र ड्रेसअपका कारण अरु अभिनेताभन्दा फरक मानिन्छ । शहरीया युवापुस्तामा राम्रो क्रेज बनाएका उनी पछिल्लो पटक फिल्म ‘यात्रा’ मा देखिएका थिए ।

तर, डेढ वर्षयता उनले कुनै फिल्म साइन गरेका छैनन् । आफू राम्रो स्क्रिप्टको पखाईमा रहेको र अब फिल्म छनोटमा चुजी हुने उनको भनाई छ । एक्सन फिल्मको प्रस्तावको प्रतिक्षामा रहेका उनले शनिवार नयाँ फिल्मको बारेमा इन्स्टाग्राममा आफ्ना प्रशंसकको प्रश्नको जवाफ दिएका छन् । उनी आफू सरप्राइजका साथ आउने सोचमा रहेको बताएका छन् ।

कोरोनाका कारण केही समय लाग्न सक्ने भए पनि चाँडै खुसीको खबर सुन्न पाउने उनको भनाई छ । उनले आफ्नो भविष्यको योजनाबारे थाहा नभएको पनि बताएका छन् । तपाईंको भविष्यको योजना के छ ? भन्ने एक प्रशंसकको प्रश्नमा सलिनमानले लेखेका छन्, ‘मलाई मेरो भविष्यको योजनाको बारेमा थाहा छैन तर अहिले म फिल्मभन्दा मेरो व्यवसायलाई प्राथमिकता दिँदैछु ।

तर, मैले सोचेको जस्तो स्क्रिप्टबाट अफर आयो भने फिल्म गर्न पनि आपत्ति छैन ।’ प्राप्त जानकारी अनुसार, फिल्म ‘यात्रा’ पछि उनले पिताको व्यवसायलाई सम्हाल्दै आएका छन् । एक प्रशंसकले ड्रेसअप परिवर्तन गर्न दिएको सुझावमा उनले फिल्ममा त्यसप्रकारको भूमिकाबाट प्रस्ताव आए ड्रेसअप परिवर्तन गर्न समस्या नभएको बताउँदै अरु समयमा भने आफूलाई सहज लाग्ने पहिरन लगाउने बताएका छन् ।

उनले आफूले गरेका दुई फिल्ममध्ये ‘यात्रा’ मनपर्ने पनि खुलाएका छन् । उनले प्रेमिका अस्प्रिना श्रेष्ठसँग चाँडै विवाह गर्ने जानकारी पनि दिएका छन् ।