बलिउडका चर्चित अभिनेता सुशान्त सिंह राजपूतको निधन भएका लामो समय भइसकेको छ । उनले मूम्बईस्थित आफ्नै घरमा पासो लगाएर ज्यान फालेपनि घटना रहस्यमय रहेको भन्दै प्रहरीले अनुसन्धान गरिरहेको छ ।
सुशान्त निधन प्रकरणलाई लिएर प्रहरीले उनी निकटका सबैसँग बयान पनि लिइसकेको छ । बलिउडका कलाकारहरुले पनि न्याय पाउनु पर्ने भन्दै आवाज उठाइरहेका छन् । यस्तै सुशान्तको परिवारले पनि न्यायको माग गरिरहेका छन् ।
यसैबीच मृत्यु पछि पनि सुशान्तले एक सम्मान पाएका छन् । क्यालिफोर्निया राज्य विधान सभाले उनलाई सम्मान गरेको उनकी बहिनी श्वेता सिंह कृतिले जानकारी गराएकी छिन् ।
फिल्म क्षेत्र तथा समुदायमा पुर्याएको योगदानको आधारमा उनलाई सम्मान गरिएको श्वेताले बताएकी छिन् । उनले भारतको स्वतन्त्रता दिवसको अवसरमा क्यालिफोर्नियाले सुशान्तको कामको कदर गर्दै सम्मान गरेको बताएकी छिन् ।
