नेपालगन्ज : पछिल्लो समय नेपाली दर्शकहरूले अत्याधिक रुचाएका चलचित्रका नायकहरु हुन पल शाह र प्रदिप खड्का। नेपाली चलचित्रमा हटकेकको रुपमा चिनिने उनीहरू निर्माताको प्रमुख रोजाइमा पर्ने नायकहरुमा पर्छन् ।

दुबैजनाले चलचित्र क्षेत्रमा आ-आफ्नो पहिचान स्थापित गरिसकेका छन् । यी दुबैजनालाई एउटै चलचित्रमा हेर्ने दर्शकको ठुलो चाह थियो। उसो त पल र प्रदीप पनि एउटै चलचित्रमा संगै काम गर्न चाहन्थे । तर त्यो संयोग भने जुरेको थिएन। अबभने दुबैजनालाई एउटै चलचित्रमा देख्न पाउने दर्शकको चाहाना पूरा हुनेभएको छ।

चलचित्र ‘प्रेमगीत’ बाट चर्चा कमाएका निर्माता सन्तोषले पल, प्रदीप लगायतका कलाकार लिएर अब नयाँ चलचित्र ‘हुतुतु’ निर्माण गर्दैछन् । यसै चलचित्रमा पल र प्रदिपलाई दर्शकले एकसाथ देख्न पाउने छन् । जसका लागि पल र प्रदिपले चलचित्र साइन गरिसकेको बताइएको छ।

चलचित्रलाई छेतन गुरुङ र सन्तोष सेनले संयुक्त रुपमा निर्देशन गर्नेछन् । चलचित्रको लागि नयाँ कलाकारहरु पनि छनोट गरिसकिएको छ ।

कमेडी जनरामा निर्माण हुने उक्त चलचित्रमा पल र प्रदिपका अलवा हरिवंश आचार्य, माओत्से गुरुङ, राजाराम पौडेल, गौरव पहारी, सलोन बस्नेत, नाजिर हुसेनको अभिनय रहने बताइएको छ । यस चलचित्र ठुलो लागतमा निर्माण हुने निर्देशक सेनले बताएका छन् । चलचित्रको छायांकन भने अर्को बर्षबाट शुरु हुने बताइएको छ ।