ज्ञानु संगम खड्का/नेपालगन्ज : पछिल्लो समय नेपाली गीत संगीतमा छाडा अनि द्विअर्थिय शब्दको प्रयोग ह्वात्तै बढेको छ। जसले गर्दा गीत संगीतमा नराम्रो विकृति पैदा गरेको छ। यो विषयमा संगीतसंग सम्बन्धित विभिन्न संस्थाहरुले कलाकारहरुलाई सजग नबनाएको पनि होइन । तरपनि युटुब भ्युजको लोभ अनि भाइरलको आसमा गायक गायिकाले द्विअर्थिय शब्द समावेश गीत गाउन तम्सिने गरेको पाइएको छ।

यस्तै, युटुब भ्युजको लोभमा गायक गोपाल जिएम परेका छन् । मंगलबार मात्रै उनले सार्वजनिक गरेको “तेरो चटक” बोलको गीत सुन्दा उनी मौलिकपन छाडेर युटुब भ्युजको लोभमा फसेको सजिलै अनुमान लगाउन सकिन्छ । रक ब्याटलको नाम दिएर बजारमा सार्वजनिक उक्त गीतको अन्तिम २/३ वटा टुक्कामा द्विअर्थिय शब्द प्रयोग गरिएको छ। गोपाल जिएम र प्रतीकगीत वाग्लेले गाएको उक्त गीत सुन्दै गर्दा ४ मिनट पछि द्विअर्थ दिने शब्द सुन्न सकिन्छ। जुन शब्दले समाजमा नराम्रो अर्थ दिने गर्छ। जुन शब्दलाई समाजमा पचाइन्न। जुन शब्दलाई नेपाली समाजमा छाडा भनेर बुझ्ने गरिन्छ।

केटा केटिको प्रेम बिबादबाट गीत सुरु हुन्छ। एक अर्कालाई आरोप प्रत्यारोप लगाउंदै गर्दा केटाका केही शब्द छाडा लाग्ने गर्छन् । जुन शब्दले गायक गोपाल जिएममाथि प्रश्न चिन्ह पैदा गरेको छ। आज सम्म मौलिक गीत सृजना गर्दै अनि गाउदै आएका उनले किन यो गीत गाए त? भन्ने प्रश्न उनलाई धेरैले गर्न थालेका छन् । यो गीतबाट उनी युटुब भ्युजको लोभमा फसेको हुनुपर्ने स्पष्ट हुने गर्छ।उनी आफैले सृजना गरेको गीत आफ्नै युटुब च्यानलबाट सार्वजनिक गरेका छन् ।

गोपाल लोक दोहोरी गायक भनेर दर्शक स्रोता सामु परिचित छन् । सायद दर्शक स्रोता अनि उनका शुभ चिन्तकले पक्कै पनि उनीबाट यस्तो गीत अपेक्षा गरेका थिएनन् । उसो त उनी लोकदोहोरी गीतको केही संघ संस्थामा पनि आबद्ध छन् । एउटा जिम्मेवार संस्थाभित्र आवद्ध कलाकारले किन यस्तो गीत गाउन हुन्नथ्यो । उक्त गीतमा समाबेश केही शब्दलाई समाजमा पचाइन्न भन्ने थाहा हुँदाहुँदै उनले गीत बजारमा ल्याएका छन् । जसले उनको प्रतिष्ठामा आँच नआउला भन्न सकिन्न ।

उनले युवा वर्गलाई लक्षित गरेर बजारमा ल्याएको उक्त गीतमा समाबेश केही शब्द युवा वर्गले पचाएपनि बुढापाकाले भने त्यस्ता शब्द पचाउन सक्दैनन् । उक्त गीतको भिडियोमा ती द्विअर्थिय शब्दलाई ढाकछोप गर्नलाई केही चिज प्रयोग गरिएको छ। तरपनि ती शब्दको सेन्स नराम्रो भन्ने सजिलै छुट्टिने गर्छ।

यस्तो छ भिडियो..