काठमाडौं : यतिबेला निर्देशक राजन भुसाल नयाँ फिल्मको तयारीमा जुटेका छन्। सन २०२६ मा रिलिज गर्ने गरि उनले काम अगाडि बढाएका छन्। फिल्मको नाम भने खुलाइएको छैन। ‘प्रोजेक्ट जेट’ नाम दिएर यतिबेला उनले नयाँ फिल्मको कामलाई तिव्रता दिएको विशेष स्रोतले जनाएको छ।

विशेष स्रोतले फिल्मीपत्रलाई दिएको जानकारी अनुसार भुसालले निर्देशन गर्न लागेको नयाँ फिल्म नेपालमा मात्र नभएर एकै मितिमा भारतका विभिन्न सिनेमाहलमा पनि प्रदर्शन हुनेछ। उक्त फिल्म नेपाली भाषासँगै हिन्दी, तमिल र तेलेगु भाषामा पनि डबिङ हुनेछ। जसको लागि भारतको ठुलो प्रोडक्सन हाउससँग कुरा भइरहेको पनि विशेष स्रोतले बताएको छ।

फिल्ममा नेपालका चलेका कलाकारहरुसँगै भारतका कलाकारहरुको पनि अभिनय रहने बताइएको छ। बुझिए अनुसार उक्त फिल्म नेपालमा आजसम्म बनेका फिल्महरुको भन्दा महंगो बजेटमा निर्माण हुनेछ। नेपालमा चलेकै ब्यानरबाट फिल्म निर्माण हुनेछ।

फिल्ममा राजन भुसालकै कथा रहनेछ, भने आकाश बराल र राजन भुसालको संयुक्त स्क्रिप्ट रहनेछ। यतिबेला स्क्रिप्टको काम भइरहेको बताइएको छ। ‘एक्टर: टेक वान’बाट निर्देशनमा डेव्यु गरेका भुसालले नयाँ फिल्म कस्तो बनाउलान् त ? त्यो त भविष्यमै थाहा होला।

उसो त राजनले यस अघि पनि आकाश बरालसँग स्क्रिप्टमा सहकार्य गरिसकेका छन्। ‘एक्टर : टेक वान’मा आकाश र राजनको संयुक्त स्क्रिप्ट रहेको थियो। यि दुबै नेपाली फिल्म उद्योगमा सम्भावना बोकेका निर्देशक एवम् लेखक हुन्।