नेपालगन्ज : यतिबेला हलमा नेपाली फिल्म ‘एक्टर:टेक वन’ले राम्रो प्रतिक्रिया पाइरहेको छ। शुक्रबारदेखि प्रदर्शनमा आएको फिल्मले दिनानुदिन दर्शकहरुको राम्रो साथ पाइरहेको छ।

दर्शकहरुको मायालाई आत्मसात गर्दै ‘एक्टर : टेक वन’ टिम नेपालगन्ज आउँदै छ। नेपालगन्जका दर्शकहरुसँग साक्षात्कार गर्ने र प्रतिक्रिया लिने उद्देश्यले फिल्मका कलाकार प्रदीप खड्का, आना शर्मा, दिव्या रायमाझी लगायतको टिम आज आइतबार नेपालगन्ज आउन लागेको हो।

कलाकारसहितको टिमले नेपालगन्जका ‘सिनेरोयल’ र ‘क्युएफएक्स बागेश्वरी’ हलमा आज बेलुकी ६ बजेको शो’मा पुगेर दर्शकसंग भेटघाट गर्नेछन्। उसो त नेपालगन्जका पत्रकारहरुसँग पनि साक्षात्कार हुने बताइएको छ।

राजन भुषालको डेब्यू निर्देशन रहेको फिल्ममा प्रदीप, आना र दिव्याका अलावा राज बल्लभ कोइराला, दिव्य देव, सुशील सिटौला लगायतका कलाकारहरुको पनि अभिनय रहेको छ। अधृत फिल्म्स र मोटि फिल्म्सको ब्यानरमा निर्माण भएको फिल्मका निर्माता थमन कुमार भण्डारी हुन्।

फिल्ममा राजन भुषाल र आकाश बरालको स्क्रिनप्ले रहेको छ। फिल्मलाई नरेन्द्र मैनालीले खिचेका हुन्।भने, निमेष श्रेष्ठले सम्पादन गरेका हुन्। यतिबेला फिल्मको प्राविधिक पक्षलाई निकै प्रशंसा गर्न थालिएको छ।