
काठमाडौं : अभिनेत्री मिरुना मगर पछिल्लो समय निकै व्यस्त छिन्। फिल्म होस् या म्युजिक भिडियो, उनको माग बढ्दो छ। आफूलाई सुहाउँदो फिल्म एवम् म्युजिक भिडियोमा उनले काम पनि गर्दै आइरहेकी छिन्।
हालैमात्र उनी अभिनित पछिल्लो म्युजिक भिडियो रिलिज भएको छ। १० दिन अघि ‘मनैमा सानुमाया’ बोलको म्युजिक भिडियो ‘भिजुअल आर्ट्स स्टुडियो’को युट्युब च्यानलबाट सार्वजनिक भएको हो।
भिडियोमा समावेश गीतमा एसडी योगी र विज्ञानी पराजुलीको स्वर रहेको छ। गीतका शब्दहरु राम अविरल बिष्टले लेखेका हुन्। एसडीले नै गीतको संगीत गरेका हुन्। गीत निकै प्रेमिल छ। अझ भनौं प्रेमिला शब्द अनि मेलोडीहरुले बनिएको छ गीतको अडियो।
उसो त भिडियो पनि निकै उत्कृष्ट बनाइएको छ। नेपालीभाषी भुटानी शरणार्थी समुदायका युवायुवतीबीचको प्रेममा आउने उतारचढावको कथालाई कलात्मक तरिकाले भिडियोमा देखाइएको छ। भिडियोमा मिरुनाको जोडीको रुपमा दीपक रसाइली छन्। यि दुईको केमिस्ट्री निकै गजब हुँदाहुँदै पनि अन्तिममा छुटिनु परेको कारुणिक दृश्यले भिडियोमा देख्न सकिन्छ।
भिडियोमा विवेक रसाइलीको कथा र निर्देशन रहेको छ। निकै आकर्षक क्यानभासमा भिडियो खिचिएको छ। भिडियोलाई उज्ज्वल जोशीको टिमले खिचेको हो। इलामका विभिन्न आकर्षक दृश्यहरु भिडियोमा देख्न सकिन्छ। भुपेन्द्र अधिकारीले भिडियो सम्पादन गरेका छन्।
गीतलाई छोटो समयमै युट्युबमा राम्रो भ्युज मिलेको छ। रिलिज भएको ११ दिनमा १० लाख बढी भ्युज गीतले युट्युबमा प्राप्त गरेको छ। युट्युबको कमेन्ट बक्स हेर्ने हो भने निकै राम्रा प्रतिक्रियाहरु देख्न सकिन्छ। उसो त गीतलाई टिकटकमा पनि निकै रुचाइएको छ। टिकटकमा पनि गीतका विभिन्न साउन्डहरुमा हजारौं भिडियोहरु बनिसकेका छन्। गीतको डिजिटल मार्केटिङ सागर लामिछाने मगरले गरेका हुन्।