
काठमाडौं : आगामी वैशाख २६ गतेदेखि प्रदर्शनमा आउन लागेको फिल्म ‘ऊनको स्वीटर’को नयाँ गीत यतिबेला युट्युवको ट्रेन्डिङमा पर्न सफल भएको छ। बिहीबार सार्वजनिक गरिएको ‘मखमली’ बोलको गीत युट्युबको पहिलो नम्बरमा परेको हो।
गीतले यतिबेला दर्शकको निकै राम्रो प्रतिक्रिया एवम् भ्युज पाइरहेको छ। सुजन चापागाईं र सुनिता थेगिमको स्वर रहेको गीतमा हर्क साउदमा शब्दहरु रहेका छन्। गीतमा सुजनकै संगीत छ।
सार्वजनिक भएको २ दिनमै गीतले ९ लाख ८० हजारबढी भ्युज युट्युबमा प्राप्त गरेको छ। उसो त गीतलाई टिकटकमा पनि औधी रुचाइएको छ। छोटो समयमै लाखौं टिकटक भिडियोहरु बनेका छन्। दर्शकहरुले पनि राम्रो प्रतिक्रिया दिएका छन्।
नवीन चौहानको डेव्यू निर्देशनमा निर्माण भएको फिल्म आर्टमाण्डुको ब्यानरमा निर्माण भएको हो। फिल्ममा विपिन कार्की, मिरुना मगर, विल्सन बिक्रम राई, परीक्षा लिम्बू, सुनिल पोखरेल, माओत्से गुरुङ, प्रेम सुब्बा लगायतका कलाकारहरुको मुख्य भुमिका रहेको छ।
फिल्ममा नवीन चौहानकै लेखन रहेको छ। सरोज कटुवाल फिल्मका सह-लेखक हुन्। चिन्तन राज भण्डारीको डिओपी, कृष्ण भण्डारीको सम्पादन फिल्ममा रहेको छ। फिल्मलाई लिएर दर्शकहरु निकै उत्साहित छन्। नेपालमा मात्र नभएर अन्य देशमा समेत ‘मखमली’ ट्रेण्डिङमा पर्न सफल भएको छ।