
काठमाडौं : केही हप्ता अघि मात्रै मोसन पोस्टर सार्वजनिक गर्दै निर्माण घोषणा गरिएको फिल्म ‘सोल्टिनी’को नयाँ पहिलो पोस्टर आउट गरिएको छ। फिल्मका मुख्य कलाकार प्रकाश सपूत र परीक्षा लिम्बूलाई प्रस्तुत गरिएको नयाँ पोस्टर आइतबार रिलिज गरिएको हो।
पोस्टरमा प्रकाश र परीक्षा निकै दुखी देखिएका छन्। प्रकाश र परीक्षाको मुहारमा बिछोडको भाव प्रष्ट देखिएको छ। पोस्टरको डिजाइन भने ट्राइडेन्ट कन्सेप्टका रोयल भिमसेनले गरेका हुन्।

अर्जुन सुवेदीको निर्देशनमा निर्माण हुन लागेको फिल्म छिट्टै सुरु हुने बताइएको छ। यतिबेला फिल्मका कलाकारहरुले वर्कसप गरिरहेका छन्। प्रकाश र परीक्षाले फिल्ममा पहिलोपटक एकसाथ स्क्रिन सेयर गर्दैछन्। फिल्म जातीय भेदभाव र अपुरो प्रेमको संवेदनशील कथामा आधारित रहनेछ।
फिल्ममा अर्जुन सुवेदी र कुमार भट्टराईको कथा रहनेछ। प्रकाश र परीक्षाका अलावा विल्सन बिक्रम राई, प्रकाश घिमिरे, रवीन्द्र झा, कविता आले लगायतका कलाकारहरुको पनि अभिनय रहनेछ। फिल्ममा प्रकाशले ‘भीमसेन पोखरेल’को पात्र निर्वाह गर्दैछन् भने परीक्षाले ‘दिलासा राई’को पात्र निर्वाह गर्दैछिन्।
प्लानेट थ्री फिल्म्सको प्रस्तुति तथा नेपसिनेको र योलो इन्टरटेन्मेन्टको सहकार्यमा बन्न लागेको यो फिल्म आगामी नयाँ वर्षको असोज ३ गते संविधान दिवसको दिनदेखि प्रदर्शनमा आउनेछ। फिल्ममा पोस्टर तथा पब्लिसिटी डिजान ट्राइडेन्ट कन्सेप्ट टिमको रहेको छ।