
काठमाडौं : अर्जुन सुवेदीले निर्देशनमा निर्माण हुन लागेको फिल्म ‘सोल्टिनी’ यही पुष १५ गतेदेखि छायांकनमा जाँदैछ। निर्माण टिमले कलाकारहरुको लाइनअप पूरा गरिसकेको छ। कलाकारहरुको लाइनअप पछि निर्माण टिमले अन्य केही सदस्यहरु पनि थपिरहेको छ।
यसैबीच, पछिल्लो समयका व्यस्त अनि लोकप्रिय म्युजिक भिडियो निर्देशक मौसम हिमालीलाई ‘सोल्टिनी’ टिमले कोरियोग्राफरको रुपमा अनुबन्धित गरेको छ। बुधबार निर्माण टिमले आफ्नो सामाजिक संजाल फेसबुक पेज मार्फत मौसमलाई कोरियोग्राफरको रुपमा अनुबन्ध गरेको जानकारी दिएको हो।
कोरियोग्राफीका हिसाबले मौसमको यो तेस्रो फिल्म हो। यस अघि उनले ‘वसन्त’ र ‘रिमै’ फिल्ममा काम गरिसकेका छन्। तर यि दुबै फिल्म रिलिज भएका छैनन्। ‘डाँडाघरे साइली’, ‘कस्मीरे पछ्यौरी’, ‘घर कता हो बहिनीको’, ‘माली गाई’, ‘रेशम’, ‘तिम्लाई पछ्यौरी’ लगायतका उनले निर्देशन तथा कोरियोग्राफी गरेका दर्जनौंबढी म्युजिक भिडियोहरु युट्युबको करोड क्लबमा प्रवेश गरिसकेका छन्।
‘सोल्टिनी’मा पनि मौसमको जादुमयी कोरियोग्राफीले दर्शकको मन जित्ने अपेक्षा गरिएको छ। उसो त मौसम मौलिक निर्देशकको रुपमा चिनिन्छन्। उनले निर्देशन गरेका भिडियोहरुमा मौलिकपन भेट्न सकिन्छ। यता ‘सोल्टिनी’ पनि मौलिक कथामा आधारित हुनेभएकोले होला निर्माण टिमले मौसमलाई कोरियोग्राफरका रुपमा भित्र्याएको।
लोकप्रिय अभिनेता प्रकाश सपूत र अभिनेत्री परीक्षा लिम्बूको मुख्य भुमिका फिल्ममा रहनेछ। प्रकाश र परीक्षाका अलावा विल्सन बिक्रम राई, प्रकाश घिमिरे, रवीन्द्र झा, कविता आले लगायतका कलाकारहरुको पनि अभिनय रहनेछ।
फिल्मका प्रकाशले ‘भीमसेन पोखरेल’को पात्र निर्वाह गर्दैछन् भने परीक्षाले ‘दिलासा राई’को पात्र निर्वाह गर्दैछिन्। भिडियोमा प्रकाश र परीक्षाको मनछुने संवाद छ। जुन संवादलाई दर्शकले यतिबेला रुचाइरहेका छन्। फिल्म जातीय भेदभाव र अपुरो प्रेमको संवेदनशील कथामा आधारित रहनेछ।
फिल्मलाई ‘रंगेली’ निर्देशक अर्जुन सुवेदीले निर्देशन गर्दैछन्। फिल्मका अर्जुनकै कथा रहनेछ। फिल्ममा प्रकाश र परीक्षाका अलावा विल्सन बिक्रम राई अनुबन्धित भइसकेका छन्। अन्य कलाकारहरुको लाइनअप भने पूरा गर्न बाँकी रहेको बताइएको छ।
प्लानेट थ्री फिल्म्सको प्रस्तुति तथा नेपसिनेको र योलो इन्टरटेन्मेन्टको सहकार्यमा बन्न लागेको यो फिल्म आगामी नयाँ वर्षको असोज ३ गते संविधान दिवसको दिनदेखि प्रदर्शनमा आउनेछ। फिल्ममा पोस्टर तथा पब्लिसिटी डिजाइन ट्राइडेन्ट कन्सेप्ट टिमको रहेको छ।