नेपालगन्ज : पश्चिम क्षेत्रमा करिब १ दशकदेखि निरन्तर निर्देशनमा सक्रिय निर्देशक हुन् नवराज सुवेदी। उनी आफूलाई निर्देशक भन्दा पनि कलाप्रेमी भन्न रुचाउँछन्। कलाप्रतिको अथाह झुकावले गर्दा नै होला सुवेदी हरबखत गीत संगीतकै प्रवर्द्धनमा खटिएका हुन्छन्।

नेपालगन्जलाई कर्मथलो बनाएका सुवेदीले हालसम्म ७८ वटा म्युजिक भिडियो निर्देशन गरिसकेका छन्। उनले निर्देशन गरेको ७८ औं म्युजिक भिडियो हो ‘थारु नमबर १’। जुन म्युजिक भिडियो केही दिन अघि मात्रै रिलिज भएको थियो। जुन गीतमा शिव जिएम र अन्नु चौधरीको स्वर रहेको छ। गीतमा उमेश मुस्कानको शब्द अनि संगीत छ।

गीतको अडियो निकै सशक्त छ। शिव र अन्नुको गायिकी गीतमा मिठासयुक्त सुनिएको छ। गीत चौधरी भाषामा आधारित छ। डान्सिङ प्याटर्नमा आधारित गीतको भिडियो पनि आकर्षक बनाइएको छ।

भिडियोलाई बाँकेका विभिन्न स्थानहरूमा छायांकन गरिएको छ। आकर्षक लोकेसनसहितको भिडियोले मन लोभ्याउँछ। थारु युवक र युवतीबीचको प्रेम कथालाई सुन्दर तरिकाले भिडियोमा देखाइएको छ। निर्देशक सुवेदीले भिडियोलाई सुन्दर अनि कलात्मक तरिकाले निर्देशन गरेका छन्।

अन्जु कुश्मी र बबी कुमार थारु भिडियोमा फिचर्ड छन्। यी दुईको नृत्य र अभिनय भिडियोमा गजब देखिएको छ। बाँकेका अधिकांश पर्यटकीय स्थलहरुलाई निर्देशक सुवेदीले भिडियोमा समेटेका छन्। भिडियोलाई रामु चौधरीले छायांकन र सम्पादन गरेका हुन। एलिजा चौधरीको एसिस्टेङ कोरियोग्राफी, अम्रता राजवीरको शृङ्गार अनि देवीराज घर्ती र सशीकला घर्तीको भिडियोमा प्रोडक्सन रहेको छ।

भिडियो सेबिल इन्टरटेन्मेन्टको युट्युब च्यानलबाट रिलिज गरिएको हो। सिमित स्रोत साधनका बाबजुद पनि भिडियोको गुणस्तरमा उत्कृष्टपन ल्याउने प्रयास निर्देशक सुवेदीले गरेका छन्। आजसम्म ७८ वटा म्युजिक भिडियो निर्देशन गरिसकेको भएपनि आफू सदैव केही न केही सिकिरहेको सुवेदीले बताए।

सुवेदीले म्युजिक भिडियो मात्र नभएर केही सर्टमुभी पनि निर्देशन गरिसकेका छन्। हाल उनी केही स्कुलमा नृत्य प्रशिक्षकको रुपमा पनि कार्यरत छन्। अब लगत्तै नयाँ म्युजिक भिडियोको काम सुरु हुने पनि उनले बताए।