ज्ञानु संगम खड्का/ काठमाडौं : यस् वर्ष नारीहरुको महान चाड हरितालिका तीजलाई लक्षित गर्दै हजार बढी गीतहरू बजारमा सार्वजनिक भए। कतिले दर्शकहरुको राम्रो साथ पाए भने कति गीत त बजारमा आएको दर्शकहरुलाई पत्तो पनि भएन। एकाध गीतहरू बाहेक अन्य गीतहरू यो वर्षको तीजमा चल्न सकेनन्। अधिकांश लगानीकर्ताको लगानी बालुवामा पानी सरह नै भयो।
औंलामा गन्न सकिने गीतहरूले मात्र यो साल दर्शकको मन छुन सफल भए। त्यही दर्शकको मन छुने गीतहरुको लिस्टमा पर्छ ‘काली पसम कि’। यो गीत सार्वजनिक भएको डेढ महिना भयो। यो अवधिमा गीतले चौतर्फी लोकप्रियता पायो। गीत सार्वजनिक हुनु अगावै गीतको पोस्टरले बेग्लै चर्चा पाएको थियो। जब गीत बजारमा आयो तब माहोल नै बेग्लै बनिदियो।
‘तीज भनेको के हो ? तीजका गीतहरू कस्तो हुनुपर्छ ? मौलिक तीज गीतहरू भनेका कस्ता गीत हुन् ?’ लगायतका सारा प्रश्नको जवाफ बनेर सार्वजनिक भएको गीतमा लोकप्रिय गायिका शान्तिश्री परियारको स्वर छ। शान्तिले गीत सार्वजनिक हुनुभन्दा अगाडि नै एउटा स्टाटस लेख्दै गीत रेकर्ड गर्दा भावुक बनेको बताएकी थिइन्।
‘काली पसम कि
आमा डोरी कसम कि
करिम यस्तै भन्दै रुँदै बसक कि
एकैछिन दु:ख होला डोरी कसम कि’
कारुणिक अनि मर्मस्पर्शी शब्दहरूले गीत सजिएको छ। गीतका शब्दहरु सर्जक प्रेम सापकोटा सोनुले लेखेका हुन्। गीतको मेलोडी पनि प्रेमले नै बनाएका हुन्। गीत सुन्ने जोकोहीलाई यो गीतले भावुक बनायो। यो वर्ष यो गीत नसुन्ने सायदै दर्शक/स्रोता होलान्।
सार्वजनिक भएको दिनदेखि नै लोकप्रियता पाएको गीतले आज तीजको दिनसम्म पनि आफ्नो चर्चा कायमै राखेको छ। लाखौं टिकटक भिडियो बनेको गीतलाई युट्युबमा पनि निकै राम्रो भ्युज छ। हालसम्म ६३ लाख बढी भ्युज युट्युवमा छ। त्यस्तै, ७८ हजार लाइक पाउँदै गीतले ३ हजार ८ सय बढी लाइक युट्युबमा पाएको छ।
अधिकांश संगीतककर्मीले गीतको तारिफ गरेका थिए। तारिफ गर्दै सामाजिक संजालमा समेत सेयर गरेका थिए। दर्शक स्रोतासँगै अन्य कलाकारहरुलाई समेत मन छोएर सेयर गर्न बाध्य पार्ने यो तीज गीत वास्तवमै एक अद्भुत सृजना हो। जसरी गीतको अडियोको चर्चाभयो त्यति भिडियोको भने त्यति चर्चा हुन सकेन।
भिडियोको केही प्रतिशत कन्सेप्ट फिल्म ‘बोक्सीको घर’को गीत ‘बुझीन मैले’सँग मिल्न गएको भन्दै केहीले आलोचनासमेत गरेका थिए। यद्यपि यि दुबै गीतका सम्बन्धित व्यक्तिबाट भने त्यस्तो धारणा आएन। भिडियोमा स्मारिका ढकाल फिचर्ड छिन्। उनले कर्म घरमा श्रीमानबाट पाएको पीडालाई भिडियोमा कलात्मक तरिकाले देखाइएको छ। स्मारिकाको जीवन्त अभिनयले नै भिडियोतर्फ दर्शकहरुको मन तानेको हो। स्मारिकाका अलावा जोन बम ठकुरीको पनि अभिनय रहेको छ।
भिडियोलाई राजेश घिमिरेले खिचेका हुन्। भिडियोको सम्पादन भने नवीन घर्तीले गरेका हुन्। उसो त गीतले दर्शक/स्रोताको अथवा माया र साथ मात्रै पाएन हप्तौंसम्म युट्युब ट्रेन्डिङको पहिलो नम्बर कब्जा गरेर बस्न समेत सफल भयो। यत्रतत्र सर्वत्र गीतले चर्चासँगै लोकप्रियता पाइरहँदा गीतका सर्जक प्रेम सापकोटा सोनु मख्ख छन्।
गीतले यतिधेरै सफलता पाउला भन्ने कल्पनासमेत नगरेको प्रेम बताउँछन्। उनले यो गीतका लागि शब्दहरु गत वर्षदेखि नै लेख्न सुरु गरेका थिए। गत वर्षा ‘आमाले भाग्य लेख्न मिल्ने भाको भा’ बोलको तीजको गीत उनले बजारमा ल्याएका थिए। उक्त गीतले पनि राम्रै चर्चा पाएको थियो। त्यसैले पनि ‘काली पसम कि’ गीत सृजना गर्ने हौसला मिलेको उनको भनाइ छ।
“गत वर्ष नै ‘काली पसम कि, डोरी कसम कि’ भन्ने थेगो फुरेको थियो”, प्रेमले फिल्मीपत्रसँगको कुराकानीमा भने, “गीतको थेगोले नै आफैलाई छोयो।त्यसपछि बिस्तारै बाँकी शब्दहरु थप्दै गएँ। तर थेगोलाई न्याय गर्ने शब्दहरु फुराउन सकिनँ। हरेक दिन शब्दहरु कोर्दै गएँ। करिब दुई दर्जनबढी शब्दहरु कोरेपछि ‘काली पसम कि’लाई मुर्तरुप दिन सफल भएको थिएँ। तर गीतले यतिधेरै लोकप्रियता पाउँछ भन्ने सोचेको थिइनँ। अग्रज, समकालीन एवम् अनुज सबैले सृजना अब्बल भएको भन्दै तारिफ गर्नुभयो। दर्शक/स्रोताहरुले पनि शब्दहरुले निकै मन छोएको प्रतिक्रिया दिनुभएको छ। जसले गर्दा मलाई आगामी दिनमा अझै अब्बल गीत सृजना गर्ने चुनौती थपिएको छ।”
यो गीतले अधिकांश नेपाली नारीहरुको पीडा बोकेको प्रेम बताउँछन्। जति खुशी देखिएपनि छोरी मान्छेहरु कुनै न कुनै पीडामा हुनेभएकोले चेलीहरुको बेदनालाई गीतमा उतारेको उनले बताए। उनका अनुसार गीतमा समावेश शब्दहरु पूरा गर्न करिब १ वर्षको समय लागेको थियो। गीतले तीजको मौलिक मर्म बोकेको उनको धारणा छ।
यो गीतले जिम्मेवारी बढाएको प्रेमले महशुस गरेका छन्। उनी भन्छन्, “अब म जस्ता पायो उस्तै गीत सृजना गरेर उम्किन पाउँदिन। आगामी दिनमा शब्द सृजनामा झनै मिहेनत गरेर अब्बल सृजना ल्याउने चुनौती थपिएको छ। अर्को साल कस्तो सृजना बाहिर ल्याउने होला भन्ने चिन्तन अहिलेदेखि नै हुन थालेको छ। उसो त म व्यवसायिक कलाकार होइन। त्यसैले पनि वर्षमा १/२ वटा गीत सृजना गर्ने तर अब्बल गर्ने सोच बनाएको छु। म आफैलाई गायक भन्न रुचाउछु तर यो गीतबाट धेरैले अब्बल सर्जक भनेर चिनिदिनुभएको छ। जुन मेरो लागि अर्को सकारात्मक चुनौती पनि हो।”
यता भिडियोको कन्सेप्ट कताकता अन्य गीतसँग मिल्न गएको भन्ने विषयमा भने प्रेम कहिँकतै मिलेको होकि भन्ने स्वीकार्छन्। तर पनि यसलाई कपी गरिएको भन्न नमिल्ने उनी बताउँछन्। अन्य गीतबाट थोरै प्रतिशत प्रभावित हुन पाइने उनको तर्क छ। उनले ‘काली पसम कि’को अडियो भिडियोमा राम्रै लगानी गरेका छन्। त्यो त गीतको भिडियो हेर्दा पनि थाहा हुन्छ। झन्डै ५ लाख बढी खर्च गरेका प्रेम यतिबेला भने गीतबाट सन्तुष्टि नै छन्।
गीतले कति आम्दानी गर्यो भन्नुभन्दा पनि गीतले कति दर्शक/स्रोताको मन छोयो र कति लोकप्रियता कमायो भन्ने कुरा विशेष र ठूलो रहेको उनक भनाइ छ। गीतले पूर्ण सन्तुष्टि दिलाएको उनी बताउँछन्।
प्रेम गीत संगीतमा लागेको झन्डै १२ वर्ष भयो। यतिका समयसम्म पूर्ण सफलताको स्वाद गीत संगीतबाट चाख्न उनले पाएका थिएनन्। तर १२ वर्षको दौरानमा ‘काली पसम कि’ले सफलताको स्वाद चखाएको उनको अनुभव छ। अहिले उनी निकै खुशी छन्।
