नेपालगन्ज : यही साउन ३२ गतेदेखि प्रदर्शनमा आउन लागेको फिल्म ‘बुलाकी’को ट्रेलर सार्वजनिक गरिएको छ। सोमबार काठमाडौंको वान सिनेमाजमा एक कार्यक्रमको आयोजना गर्दै ट्रेलर सार्वजनिक गरिएको हो। ट्रेलर सार्वजनिक भएलगत्तै यतिबेला फिल्मको प्रचारप्रसारलाई तिव्र पारिएको छ।
“बिदेशीलाई होइन नेपाली चलचित्रलाई माया गरौं”- भन्ने नाराका साथ फिल्मको टिमले यतिबेला देशव्यापी प्रचारप्रसारलाई अगाडि बढाएको छ। यसैबीच, नेपालगन्जमा पनि अटोरिक्सामा फिल्मको पोस्टर टाँसेर प्रचार गरिएको छ। नेपालगन्ज शहरमा गुड्ने करिब ५० बढी अटोरिक्सामा निर्माण टिमले फिल्मको पोस्टर टाँसेको हो।
फिल्मले कर्णालीको कथा बोकेको भएर विशेषगरी पश्चिम भेगलाई लक्षित गर्दै सबै बर्गका दर्शकहरुमाझ पुर्याउने उद्देश्यले अटोरिक्सामा पोस्टर टाँसिएको निर्माण टिमले बताएको छ। नेपालगन्जमा मात्र नभएर पोखरा, चितवन, बुटवल, दाङ र धनगढीमा समेत अटिरिक्सामा पोस्टर टाँसिएको बताइएको छ।
लक्ष्मण सुनारको निर्देशनमा बनेको फिल्ममा सुरक्षा पन्त, विराज विष्ट, नरेन खड्का, सरस्वती खत्री, लक्ष्मी गिरी, रमेश बुढाथोकी, सुशिल पोखरेल लगायतका कलाकारहरुको प्रमुख अभिनय रहेको छ। फिल्मले यसअघि सम्पन्न फिल्म महोत्सव तथा अवार्डहरूमा हरेक विधामा उत्कृष्ट कहलिँदै अब्बलता प्रस्तुत गरिसकेको छ ।
फिल्मको कथा राजबहादुर सानेले लेखेका हुन्। गत वर्ष प्रदर्शनमा आएको ‘बुलाकी’लाई हलबाट निर्माताले १ दिनमै उतारेका थिए। अधिकांश दर्शकको मागका कारण परिमार्जित गर्दै पुनः प्रदर्शनमा ल्याउन लागिएको निर्माता बिराज बिष्टले बताएका छन्।
