नेपालगन्ज : अनिल बुढामगर निर्देशित फिल्म ‘घर ज्वाईं’ आज शुक्रबारदेखि प्रदर्शनमा आएको छ। प्रदर्शनको पहिलो दिन फिल्मले देशभर दर्शकको राम्रो साथ पाइरहेको छ। फिल्म हेरेका दर्शकले पनि राम्रो प्रतिक्रिया दिएका छन्।

यता नेपालगन्जमा पनि फिल्मले पहिलो दिन दर्शकको राम्रो साथ पायो। पहिलो दिनमै नेपालगन्जको सिनेरोयलमा ‘घर ज्वाईं’ हेर्न आउने दर्शकको भिड बाक्लो थियो। शुक्रबारका प्रायः सबै शोहरुमा दर्शकहरुको उत्साहजनक उपस्तिथि थियो। नेपालगन्जकै क्युएफएक्स बागेश्वरीमा पनि दर्शकको राम्रो उपस्तिथि थियो।

फिल्मले हसाउँदा हसाउँदै रुवाएको भन्दै नेपालगन्जका दर्शकहरुले प्रतिक्रिया दिएका छन्। फिल्म हेर्दा रुकुममै पुगेको आभाष भएको पनि दर्शकहरूले बताए। मौलिक कथाले भरिएको फिल्म हेर्न पाउँदा रिफ्रेसमेन्ट मिलेको पनि दर्शकहरुको भनाइ छ।

उसो त मंगलबार राजधानीमा भव्य कार्यक्रमको आयोजना गर्दै फिल्मको प्रिमियर गरिएको थियो। प्रिमियरमा पनि फिल्मले राम्रो प्रतिक्रिया पाएको थियो। फिल्मले भोलि शनिबार झन् आकर्षक व्यापार राम्रो गर्ने आँकलन गरिएको छ। मौलिक कथामा निर्माण भएको फिल्मका लेखक पनि अनिल बुढा मगर नै हुन्।

फिल्ममा अनिल बुढा मगर, विनोद खतिवडा र सुवास कोइरालाको पटकथा रहेको छ। जिएम मुभिज प्रोडक्सनको प्रस्तुति रहेको फिल्म रुकुमका विभिन्न स्थानमा छायांकन गरिएको हो।

दयाहाङ राई र मिरुना मगरको फिल्ममा मुख्य भुमिका रहेको छ। त्यस्तै शिशिर बाङ्देल, राज थापा मगर, कविता आलेमगर, बुद्धि तामाङ, पुष्कर गुरुङ लगायतका कलाकारहरुको पनि फिल्ममा अभिनय रहेको छ। फिल्मलाई सुशान प्रजापतिले खिचेका हुन् भने कृष्ण भण्डारीले सम्पादन गरेका छन्।