काठमाडौं : राजन भुसालको निर्देशनमा निर्माण हुन लागेको फिल्म ‘एक्टर’को छायांकन आरम्भ गरिएको छ। शुक्रबार निर्माण टिमले पोखराको विन्ध्यवासीनी मन्दिरमा पूजा गर्दै छायांकन सुरु गरेको हो।
मन्दिरमा फिल्मका मुख्य कलाकार प्रदीप खड्का, दिव्या रायमाझी, निर्देशक राजन भुसाल, निर्माता थमन कुमार भण्डारी लगायतको टिमले क्यामरा पूजा गरेका थिए।
अदृत फिल्मसको ब्यानरमा निर्माण हुन लागेको यस् फिल्मबाट दिव्याले डेव्यू गर्दैछिन्। फिल्ममा प्रदीपको जोडीको रुपमा दिव्या रहनेछिन्। उसो त फिल्ममा मुख्य कलाकारको रुपमा अभिनेत्री आना शर्मा पनि रहेकी छिन्। राजबल्लभ कोइराला, दिव्य देव, सुशील सिटौला लगायतका कलाकारहरुको पनि फिल्ममा अभिनय रहनेछ।
फिल्ममा निर्माताको रुपमा थमन कुमार भण्डारी रहेका छन्। एनिस भुसाल फिल्मको सह- निर्माताको रुपमा रहेका छन्। तोरन क्षेत्री फिल्मका लाइन प्रोड्युसर हुन्।
रोयल भिमसेन (ट्राइडेन्ट कन्सेप्ट)को पोस्टर तथा पब्लिसिटी डिजाइन फिल्ममा रहनेछ। फिल्मलाई नरेन्द्र मैनालीले खिचिरहेका छन्। फिल्मलाई लिएर निर्माण टिम नै निकै उत्साहित रहेको छ।
