काठमाडौं : दिनेश राउत निर्देशित चलचित्र ‘पुजार सार्की’को दोस्रो गीत रिलिज गरिएको छ। निर्माण टिमले मंगलबार ‘रिमै’ बोलको गीत ओएसआर डिजिटलको युट्युब च्यानलबाट रिलिज गरेको हो।

गीतमा देवेन्द्र बराल बराल र मुना ठटालको स्वर रहेको छ। गीत प्रेमिल एवम् मेलोडियस छ। कताकता सेन्टिमेन्टल लागेपनि गीत प्रेमिल छ। गीतमा दिनेश राउतका शब्दहरू छन्। सुवास भुसालले गीतमा संगीत भरेका छन्।

यता भिडियोमा भने फिल्मका कलाकार आर्यन सिग्देल र अन्जना बराइली मुख्य रुपमा फिचर्ड छन्। अन्जना र आर्यनको प्रेम भिडियोमा प्रेमिल देखिएको छ। उसो त, फिल्मा अर्का मुख्य कलाकार प्रदीप खड्का, पल शाह र परीक्षा लिम्बूलाई पनि भिडियोमा देख्न सकिन्छ।

भिडियोले धेरै कुरा दर्शाएको छ। आर्यनले अन्जनाको सिउँदो रंगाइदिएका छन् भिडियोमा। तर सिउंदो भरेको कुरा चाहिँ अन्जनाले सपना देखेको तरिकाले भिडियोमा प्रस्तुत गरिएको छ।  प्रदीप र परिक्षाको लुकिछिपी प्रेम पनि भिडियोमा देख्न सकिन्छ। भिडियोको अन्तिममा संवाद वाला दृश्य पनि छ। उक्त दृश्यले झन् धेरै कौतुहलता पैदा गर्छ।

फर्स्टलुक पोस्टरबाटै चर्चा पाएको ‘पुजार सार्की’का यस् अघि रिलिज भएका क्यारेक्टर पोस्टरहरु, टिजर र पहिलो गीतलाई दर्शकले औधी मन पराएका छन्। अब भने दर्शकहरु ट्रेलर र पूरा चलचित्रको पर्खाइमा रहेका छन्। किङ्डम नेटवर्कको ब्यानरमा निर्माण भएको यो चलचित्र आगामी जेठ १० गते बिहीबार (बुद्ध जयन्ती)को दिनदेखि विश्वव्यापी एकसाथ रिलिज हुँदैछ।

चलचित्रमा विकास सुवेदीको कथा रहेको छ। सुवास भुसाल निर्माता रहेको चलचित्रलाई नेपालमा आरआर फिल्म्सले वितरण गर्दैछ।भने अन्तर्राष्ट्रिय रुपमा चाहिँ एमएमएस इन्टरटेन्मेन्टले वितरण गर्नेछ। चलचित्रको पोस्टर तथा पब्लिसिटी डिजाइनर ट्राइडेन्ट कन्सेप्टका रोयल भिमसेन हुन्।

सामाजिक तथा मौलिक कथावस्तुमा आधारित यो चलचित्रलाई राजेश श्रेष्ठले खिचेका हुन्। सम्पादन भने भरत रेग्मीले गरेका हुन्। सुप्रीम पराजुलीले चलचित्रको रंग संयोजन गरेका छन्।