काठमाडौं : सुयोग गुरुङ निर्देशित फिल्म ‘फर्की फर्की’को ट्रेलर रिलिज भएको छ। काठमाडौंको सिटिसेन्टर स्थित बिग मुभिजमा एक कार्यक्रमको आयोजना गर्दै निर्माण टिमले ट्रेलर रिलिज गरेको हो।
ट्रेलर ३ मिनेट २६ सेकेन्डको छ। ट्रेलरमा फिल्मका मुख्य कलाकार अनमोल केसी र जसिता गुरुङलाई बढी स्पेस दिइएको छ। अनमोल र जसिताको प्रेममा आउने उतारचढाव ट्रेलरमा देख्न सकिन्छ। प्रेम, रोमान्स र द्वन्दले भरिएको छ ट्रेलर। अनमोल र जसिताको अभिनय ट्रेलरमा सशक्त लाग्छ।
आगामी जेठ १० गतेदेखि प्रदर्शनमा आउन लागेको ‘फर्की फर्की’मा सुयोग गुरुङकै कथा रहेको छ। रोहित अधिकारी यो फिल्मका निर्माता हुन्। फिल्ममा नरेन्द्र मैनालीको छायांकन र सुरेन्द्र पौडेलको सम्पादन रहेको छ।
काफिया फिल्म्स र कुबेर फिल्म्सले ‘फर्की फर्की’लाई वितरण गर्दैछन्। फिल्मलाई लिएर विशेषगरी अनमोल निकै आशावादी रहेका छन्। उसो त, अनमोलका शुभचिन्तकहरु फिल्मको पर्खाइमा छन्।
