काठमाडौं : आगामी वैशाख २८ गतेदेखि प्रदर्शनमा आउन लागेको फिल्म ‘खजुरे ब्रो’को टिजर युट्युबको ट्रेन्डिङमा पर्न सफल भएको छ। ३ दिन अघि बुढासुब्बा डिजिटलको युट्युब च्यानलबाट रिलिज भएको टिजर यतिबेला युट्युबको फिल्म सेक्सन अन्तर्गत ट्रेन्डिङ लिस्टमा पर्न सफल भएको हो।

यो समाचार तयार पार्दासम्म ‘खजुरे ब्रो’को टिजर युट्युबको फिल्म सेक्सन अन्तर्गत ट्रेन्डिङ नम्बर १७ मा छ। टिजरलाई युट्युबमा राम्रो प्रतिक्रिया पनि मिलिरहेको छ।

खजुरेको क्यारेक्टर निर्वाह गरेका रेयर राइले टिजरमा बाजि लगाएर साबुन खाएका छन्। त्यस्तै रेयरले फिल्मकी नायिका नीति शाहलाई बाइकको पछाडि बसाएर रोमान्टिक मुडमा घुमाइरहेको पनि टिजरमा देख्न सकिन्छ। त्यस्तै, कलाकार महेश त्रिपाठी, नवीन मानन्धर लगायतका कलाकारलाई पनि टिजरमा देखाइएको छ।

टिजर हेर्दा नै दर्शकलाई मनोरञ्जन पैदा हुन्छ। एक खालको कौतुहलता टिजरले जगाउँछ। गीत अनि अफिसियल पोस्टरमा नीतिलाई कम स्थान दिइएको आभाष भएको थियो। तर टिजरमा भने दर्शकलाई त्यो आभाष हुँदैन।

दिव्यदृश्य इन्टरटेन्मेन्टको व्यानरमा निर्माण भएको ‘खजुरे ब्रो’लाई सुरज सुनुवारले निर्देशन गरेका हुन्। सुरजकै कथा फिल्ममा छ। फिल्ममा सुरज सुनुवार र नवीन मानन्धर निर्माताको रुपमा रहेका छन्। फिल्मलाई शिशिर बिशांकेले खिचेका हुन् भने मित्र डि गुरुङले सम्पादन गरेका हुन्।

फिल्ममा नीति शाह, रियर राई, महेश त्रिपाठी, नवीन मानन्धर, विनिता थापा, पुकार कार्की, प्रकाश भुजेल, मनिष राउत लगायतका कलाकारहरुको अभिनय रहेको छ। फिल्मको पब्लिसिटी डिजाइनर रोयल भिमसेन (ट्राइडेन्ट कन्सेप्ट) हुन्।

नितिको यो डेव्यू फिल्म हो। पहिलो फिल्म भएकोले पनि नीति निकै उत्साहित छिन्। धरानका चर्चित व्यक्ति खजुरे ब्रोको नाम र उही क्यारेक्टरमा कमेडी जनरामा फिल्म बनेको हो। फिल्ममा खजुरे ब्रोको भूमिका रेयर राईले निर्वाह गरेका छन्।