काठमाडौं : बहुप्रतिक्षित चलचित्र ‘पुजार सार्की’को टिजर रिलिज गरिएको छ। ओएसआर डिजिटलको युट्युब च्यानलबाट निर्माण टिमले शुक्रबार टिजर रिलिज गरेको हो।

१ मिनेट २५ सेकेन्ड लामो टिजरमा चलचित्रका सबै मुख्य कलाकारहरुलाई प्रस्तुत गरिएको छ। टिजरमा मुख्य कलाकार आर्यन सिग्देल, प्रदीप खड्का, पल शाह, अन्जना बराइली र परीक्षा लिम्बूलाई निकै पृथक शैलीमा देख्न सकिन्छ।

टिजरमा आर्यन पुजारको भुमिकामा छन्। त्यस्तै, प्रदीपले दमाहा बजाइरहेका छन् भने पल चाहिँ बन्दुक ताकेर गोली पड्काउँदै गरेको अवस्थामा छन्। चलचित्रमा आर्यनको जोडी अन्जना र प्रदीपको जोडी परिक्षा भएको आभाष टिजरले गराएको छ।

उसो त डोली चढेर जन्ती हिडेका आर्यनलाई केही भिडले आक्रमण पनि गरेका छन्। उक्त आक्रमणमा प्रदीप पनि परेका छन्। टिजरले एउटा छुट्टै खालको छवि दर्शकको दिमागमा बसाल्छ। समग्रमा निकै चाख लाग्दो छ टिजर।

मल्टिस्टारर यो चलचित्रलाई लिएर दर्शकहरु निकै प्रतिक्षामा रहेका छन्। बुद्ध जयन्तीको अवसर पारेर यो चलचित्र आगामी नयाँ वर्षको जेठ १० गतेदेखि विश्वभर एकसाथ प्रदर्शनमा आउँदैछ।

चलचित्रलाई दिनेश राउतले निर्देशन गरेका हुन्। विकास सुवेदीको चलचित्रमा कथा रहेको छ। चलचित्रका निर्माता सुवास भुसाल हुन्। किङ्डम नेटवर्कको ब्यानरमा निर्माण भएको चलचित्रमा जातीय विभेद विरुद्ध उत्रेका गाउँका ३ युवाहरुको कथालाई उठान गरिएको छ। चलचित्रको पोस्टर तथा पब्लिसिटी डिजाइन रोयल भिमसेन (ट्राइडेन्ट कन्सेप्ट)ले गरेका हुन्।

आर्यन, प्रदीप र पलका अलावा अञ्जना बराइली, परीक्षा लिम्बू, मोहन निरौला, लोकेन्द्र लेखक, सुवास गजुरेल, विद्या कार्की, तारा शर्मा, शंकर आचार्य, प्रेम सुब्बा, गोविन्द रमण पराजुली, राजेश बिसुराल लगायतको पनि चलचित्रमा अभिनय रहेको छ।

चलचित्रलाई राजेश श्रेष्ठले खिचेका हुन्। भरत रेग्मीले चलचित्र सम्पादन गरेका हुन्। त्यस्तै  चलचित्रको रंग संयोजन चाहिँ सुप्रीम पराजुलीले गरेका हुन्। चलचित्रको अन्तर्राष्ट्रिय वितरण एमएमएस इन्टरटेन्मेन्टले गर्नेछ भने नेपालमा आरआर फिल्मसले गर्दैछ।