काठमाडौं : आगामी वैशाख २८ गतेदेखि प्रदर्शनमा आउन लागेको फिल्म ‘खजुरे ब्रो’को अफिसियल पोस्टर रिलिज गरिएको छ। आइतबार निर्माण टिमले फिल्मका मुख्य कलाकारसहितको पोस्टर रिलिज गरेको हो।

पोस्टरमा रियर राई, महेश त्रिपाठी, नवीन मानन्धर र नीति शाहलाई देख्न सकिन्छ। महेशले काखभरी पैसा बोकेका छन्। रियर भने बाइक हुइकाउँदै नितिलाई सम्झिरहेका छन्। त्यस्तै पोस्टरमा कलाकार नवीन मानन्धर चाहिँ ग्राजुयटको ताज पहिरिएको अवस्थामा छन्। समग्रमा पोस्टर आकर्षक नै छ।

फिल्मको केही विषयवस्तुलाई पनि पोस्टरले झल्काएको छ। प्रदर्शन मिति नजिकिँदै गर्दा निर्माण टिमले प्रचारप्रसारलाई तिव्रता दिँदैछ। केही हप्ता अघि निर्माण टिमले ‘लभ गर्ने मान्छे’ रिलिज गरेको थियो। अब टिजर र ट्रेलर रिलिज गर्ने तयारीमा छ टिम।

दिव्यदृश्य इन्टरटेन्मेन्टको व्यानरमा निर्माण भएको फिल्मलाई सुरज सुनुवारले निर्देशन गरेका हुन्। सुरजकै कथा फिल्ममा छ। फिल्ममा सुरज सुनुवार र नवीन मानन्धर निर्माताको रुपमा रहेका छन्।

फिल्ममा नीति शाह, रियर राई, महेश त्रिपाठी, नवीन मानन्धर, विनिता थापा, पुकार कार्की, प्रकाश भुजेल, मनिष राउत लगायतका कलाकारहरुको अभिनय रहेको छ। फिल्मको पब्लिसिटी डिजाइनर रोयल भिमसेन (ट्राइडेन्ट कन्सेप्ट) हुन्।

नितिको यो डेव्यू फिल्म हो। पहिलो फिल्म भएकोले पनि नीति निकै उत्साहित छिन्। धरानका चर्चित व्यक्ति खजुरे ब्रोको नाम र उही क्यारेक्टरमा कमेडी जनरामा फिल्म बनेको हो। फिल्ममा खजुरे ब्रोको भूमिका रेयर राईले निर्वाह गरेका छन्।