काठमाडौं : गीत र टिजर सार्वजनिक गरिसकेको चलचित्र ‘महाजात्रा’ टिम अब ट्रेलर सार्वजनिक गर्ने तयारीमा छ। गीत र टिजरले प्रायः दर्शकको मन जितिसकेको छ। ट्रेलर रिलिज गर्दै प्रचारप्रसारको लागि टिम आगामी फागुन २१ गतेदेखि मोफसल टुरमा निस्किने तयारीमा छ।

उता चलचित्रको पूर्वमा पनि प्रचारप्रसार सुरु भइसकेको छ। एउटा गाडी नै पूर्णरुपले ‘महाजात्रा’को पोस्टरले सजिएको छ। सार्वजनिक धेरै स्थलमा सहजै पुग्ने भएकोले प्रचारप्रसारको लागि बसलाई पोस्टरले श्रिङ्गारिएको छ। पोस्टरले सजिएको बसको तस्वीर सार्वजनिक गर्दै चलचित्र पत्रकार संघ नेपाल इटहरीका अध्यक्ष विनोद विश्वकर्माले ‘महाजात्रा’को प्रचारप्रसार पूर्वमा सुरु भएको बताएका हुन्। उसो त, पोस्टरले सजिएको गाडीमै ‘महाजात्रा’ टिमले नेपाल टुर गर्नेछ।

यता चलचित्रका मुख्य कलाकार विपिन कार्की र वर्षा राउत पनि प्रचारप्रसारकै ‘कमेडी च्याम्पियन सिजन ३’को ग्रान्ड प्रिमियरमा पुगेका थिए। जहाँ उनीहरूले चलचित्र छायांकनको बेलाको अनुभव सुनाएका थिए। षट्कोण आर्ट्सको ब्यानरमा निर्माण भएको चलचित्रमा निर्माताको रुपमा म्याक्स दिपेश खत्री र यज्ञश्वर पौडेल रहेका छन् भने कार्यकारी निर्मातामा रवीन्द्र सिंह बानियाँ रहेका छन्।

पैसाको व्यवस्थापन गर्दा आइपर्ने समस्याको कथा बोकेको कमेडी जनराको ‘महाजात्रा’को लेखन र निर्देशन प्रदीप भट्टराईले गरेका हुन्। हरिवंश आचार्य, विपिन कार्की, रविन्द्रसिंह बानियाँ, रविन्द्र झा, वर्षा राउत, अर्जुन जंग शाही, प्रकाश घिमिरे, राजाराम पौडेल, प्रवीण खतिवडा, दिव्यदेव, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय चलचित्रमा अभिनय रहेको छ। चलचित्रमा पोस्टर र पब्लिसिटी डिजाइन ट्राइडेन्ट कन्सेप्ट(रोयल भिमसेन)को रहेको छ।

तस्वीर : विनोद विश्वकर्मा