नेपालगन्ज : दिपेन्द्र के खनाल निर्देशित चलचित्र ‘पशुपति प्रसाद २: भष्मे डन’ यतिबेला हलमा प्रदर्शनरत छ। शनिबारदेखि यो चलचित्र हलहरुमा लागेको हो। पहिलो दिन नै बम्पर ओपनिङ गरेको यो चलचित्रलाई दर्शकले साथ दिइरहेका छन्।
नेपालगन्जमा पनि यो चलचित्रलाई दर्शकले लामो समयदेखि कुरेर बसेका थिए। चलचित्र हेर्न निकै उत्साहित एक समुहले त केक नै काटेर शुभकामना दियो। शनिबार नेपालगन्जको क्युएफएक्स सिनेमाज बागेश्वरीमा पहिलो शो हेर्न गएका ‘भष्मे डन’का फ्यानहरुले ‘बेस्ट विसेस्’ केक काटेर शुभकामना दिएका हुन्।
धारणा आचार्यको संयोजकत्वमा करिब १० जनाको टिमले केक काटेको हो। केक काटिसकेपछि उक्त टिमले चलचित्रलाई सफलताको शुभकामना दिएका थिए।
खगेन्द्र लामिछानेको लेखन तथा निर्माणमा यो चलचित्र तयार भएको हो। टुकी आर्ट्सको ब्यानरमा निर्माण भएको चलचित्रमा विपिनका अलावा स्वस्तिमा खड्का, रविन्द्र सिंह बानियाँ, माओत्से गुरुङ, प्रकास घिमिरे, लोकेन्द्र लेखक, मिस्श्री थापा लगायतका कलाकारहरुको अभिनय रहेको छ।
