काठमाडौं : लोक तथा दोहोरी गायक प्रेम सापकोटा ‘सोनु’को विशेषता बेग्लै किसिमको छ। प्रायः आफुले गाउनी गीत आफै लेख्छन् उनी। लेख्ने मात्रै कहाँ होर शब्द अनुसारको मेलोडी पनि आफै तयार गर्छन्। अनि आफ्नै युट्युब च्यानलबाट बजारमा ल्याउँछन्।
उनको डायरी हेर्ने हो भने नयाँ गीतहरुका शब्दले भरिएको देख्न सकिन्छ। कुनै नयाँ गीतको शब्द फुर्यो कि उनले डायरीमा टिपी हाल्छन्। मौलिकपन मै रहेर हरेकपटक पृथकता दिन प्रयास गर्ने प्रेमले पछिल्लो केही समययता वर्षमा दुई वा तीन वटा गीतसम्म बजारमा ल्याउने गर्छन्।
यो वर्ष पनि उनले एउटा नयाँ गीत आफ्नै युट्युब च्यानलबाट दर्शक स्रोतामाझ ल्याएका छन्। उनले ‘वन केरा’ बोलको गीत २ हप्ता अघि बजारमा ल्याएका हुन्। गीतमा प्रेमसँगै शान्ता सुनारको सुमधुर आवाज सुन्न सकिन्छ। गीतमा शब्द अनि संगीत भने प्रेमकै रहेको छ।
गीत सुन्दा मौलिक लाग्छ। मौलिकपन भन्दा टाढा गएर प्रेमले मेलोडी बनाएका छैनन् यो गीतमा। मौलिकपनलाई नछोडेर मीठो तरिकाले भाका बनाएका छन् उनले। उसो त, गाउन पनि मीठो तरिकाले गाएका छन्। प्रेम र शान्ताको गायकीको मिठास छुट्टै छ। यस् भन्दा अघि ‘जाले रुमाल’ बोलको गीतमा सँगै काम गरिसकेका प्रेम र शान्ताले दोस्रोपटक यो नयाँ गीतमा सहकार्य गरेका हुन्।
झट्ट सुन्ने जोकोहीलाई गीतको अडियोले तानिराख्छ। भिडियो पनि कुनै तामझाम बिना साधारण तर गजब छ। लोकप्रिय मोडल लोमश शर्मा र अस्मिता रनपाल भिडियोमा फिचर्ड छन्। उनीहरूको आकर्षक डान्स भिडियोमा देख्न सकिन्छ।
भिडियोलाई कुमार केसीले निर्देशन गरेका हुन्। दिनेश पराजुलीले आकर्षक फ्रेममा खिचेको भिडियोलाई अमृत चापागाईंले सम्पादन गरेका छन् । प्रशान्त मगर भने भिडियोका कोरियोग्राफर हुन्।
गीत रिलिज भएको दुई हप्तासम्म गीतलाई युट्युबमा जम्मा ३९ हजार मात्र भ्युज छ। यो भ्युज निकै कम हो। किनकी यस्तो राम्रो मौलिक गीतमा रिलिज भएको २ हप्तासम्म राम्रै भ्युज आउनुपर्ने थियो। तर गीतले भ्युज पाउन नसके पनि प्रतिक्रिया भने निकै राम्रो पाएको छ।
युट्युबको कमेन्ट सेक्सन हेर्ने हो भने सबै कमेन्ट सकारात्मक छन्। गीत राम्रो भएको सबैको प्रतिक्रिया छ। एउटा पनि नकारात्मक कमेन्ट छैन। अब यो कुरालाई मनन गर्ने हो भने गीत सफल भएको मानिन्छ। तर पछिल्लो समय भ्युजले नै गीत चलेको-नचलेको मापन गर्ने गरिन्छ। जुन आफैमा राम्रो होइन।
जे होस्, गीतले युट्युबमा राम्रो भ्युज पाउन नसकेपनि प्रतिक्रिया राम्रै पाइरहेको छ। राम्रो भ्युज आओस् भन्ने त सबैको चाह हुन्छ नै। तरपनि कम भ्युज आउँदैमा भने यस् गीतका गायक प्रेम सापकोटा ‘सोनु’ दुखी भने छैनन्। सुन्ने र हेर्ने जतिले गीतलाई दिएको राम्रो प्रतिक्रियाले नै आफू सन्तुष्ट रहेको प्रेम बताउँछन्।
