काठमाडौं : यतिबेला गायिका समीक्षा अधिकारीलाई ढाडस दिनेहरुको संख्या बढ्दो छ। केही दिन अघि मात्रै एपिवान टेलिभिजनको कार्यक्रम ‘द प्रकाश सुवेदी’ शोमा गएर आफ्नो जीवनमा घटेको घटनाको बारेमा वास्तविकता खुलाएपछि समिक्षालाई सही भन्नेको संख्या यतिबेला बढीरहेको छ।

यसैबीच, अभिनेता आमेश भण्डारीले पनि एउटा लामो स्टाटस लेख्दै समिक्षाको साथमा उभिएका छन्। हाल अष्ट्रेलियामा रहेका आमेशले समिक्षालाई प्रशंसा गर्दै ‘गोल्डेन हार्ट’ भएकी केटी बताएका छन्। “समीक्षा तिमी गोल्डेन हार्ट भएकी केटी हौ”, आमेशले लेखेका छन् , “लुकेर होइन शीर ठाडो गरेर हिँड्ने हो। तिमीलाई बुझेको मान्छेलाई मात्र थाहा छ, तिमी ‘गोल्डेन हार्ट’ भएको केटी हौं भनेर। म सार्है खुशी छु, तिमीले श्रोताहरूबाट आफ्नो हकको माया पाइरहेकी छौ।”

आमेशको यो पोस्टमा सयौं लाइक कमेन्ट छन्। धेरैले समिक्षाको सपोर्टमा कमेन्ट पनि गरेका छन्। समीक्षा अष्ट्रेलिया गएपछि यि दुईको मित्रताले झन् ठुलो रुप लिएको हो। अस्ति अन्तर्वार्तामा पनि समिक्षालाई आमेशको बारेमा सोधिएको थियो। समिक्षाले भमे आमेश एउटा नजिकको साथी मात्र रहेको बताएकी थिइन्।

तर समीक्षा अष्ट्रेलियामा रहँदा भने यि दुइले संगै बनाएका टिकटकहरु ब्याकटुब्याक आइरहेका थिए। धेरैले यि दुई हाल प्रेम सम्बन्धमा रहेको पनि शंका गरेका छन्। तर समिक्षाले भने आमेश एउटा राम्रो नायक र राम्रो स्वर भएको गायक भनेकोले आफुलाई मन पर्ने बताउँछिन्। आफ्नो दुखमा आमेशले साथीको रुपमा धेरै साथ दिएको उनको भनाइ छ।

आमेशले छिट्टै भेट्ने आश्वासन दिँदै बाँकी धेरै कामहरू गर्न बाँकी रहेको कुरा पनि स्टाटसमा उल्लेख गरेका छन्। आमेशले समिक्षासँगको आफ्नो फोटो फेसबुलमा सेयर गर्दै पोस्ट गरेको पूरा स्टाटस यस्तो छ:-

‘तिमीलाई बुझेको मान्छेलाई मात्र थाहा छ, तिमी ‘गोल्डेन हार्ट’ भएको केटी हौं भनेर। म सार्है खुशी छु, तिमीले श्रोताहरूबाट आफ्नो हकको माया पाइरहेकी छौ। नआत्तिनु अझै धेरै सफलताले तिम्रो कदम चुम्न पर्खिराछ। कडा मेहेनत गर र हामीलाई पहिले गराए जस्तै गौरवशाली गराउ’ आमेशले आफ्नो स्टाटसमा भनेका छन्, ‘मलाई थाहा छ, त्यो बेला नेपालमा हुँदा स्टुडियोमा भेट्दा कति डराएर लुकेर हिँड्नपर्थ्यो, मैले त्यो बेला पनि सहयोग गरेको थिएं, सँधै गर्छु पनि। मलाई तिम्रो पीडा थाहा छ, अब लुकेर हिँड्न पर्दैन शीर ठाडो गरेर हिँड्ने हो। अझै पनि खुट्टा तान्ने हुन्छन्, अघि बढ्दै जाने हो। प्राउड अफ यू। छिट्टै भेटुला। चाँडै धेरै कामहरू गर्नुपर्छ।’

समीक्षा अष्ट्रेलिया पुगेलगत्तै एक कार्यक्रममा यि दुईले संगै एकै स्टेजमा आफ्नो प्रस्तुति समेत दिएका थिए। आमेश र समिक्षाले ‘तिमी नै तिमी’बोलको गीत युगल रुपम अष्ट्रेलियाका दर्शकमाझ प्रस्तुति दिएका थिए। उनीहरूको प्रस्तुतिमा दर्शकहरु पनि निकै झुमेका थिए।

आफ्नो जीवनमा घटेको घटनापछि समिक्षाले पहिलो स्टेज कार्यक्रम अष्ट्रेलियामै गरेकी थिइन्। करिब डेढ महिना अष्ट्रेलिया बसेकी समीक्षा केही हप्ता अघि मात्रै नेपाल फर्किएकी थिइन्। नेपाल फर्केपछि आफ्नो देश छोडेर कहाँ जान सकिन्छ र भन्दै स्टाटस समेत लेखेकी थिइन्।

पोखराको एक कलेजमा कक्षा १२ मा अध्ययन गरिरहेकी समिक्षा यतिबेला बोर्ड परिक्षाको तयारीमा रहेकी छिन्। परीक्षा पश्चात् नयाँ गीत बजारमा ल्याउने उनको योजना छ। त्यसो त, संगीतकार अर्जुन पोखरेलले समिक्षासँगको सहकार्यमा ‘लैजा सन्देश’ बोलको गीत ल्याउने घोषणा गरेका छन्।

उता आमेशको कुरा गर्ने हो भने केही समय पहिला नायिका निता ढुंगानाले विवाह गर्दैगर्दाको समयमा आमेश निकै चर्चामा आएका थिए। निताकै फिल्मबाट रजतपटमा डेव्यू गरेका आमेश र निताको प्रेम सम्बन्ध टुटेको थियो। आमेशसँगको सम्बन्धले ब्रेक लिएपछि निताले निकै लामोसमयपछि ज्योतिषी तथा नायक हरिहर अधिकारीसँग विवाह गरेकी हुन्।

आमेश एउटा राम्रो गायक पनि हुन्। उनले गाएका आधा दर्जन गीतहरू बजारमा छन्। उनका गीतहरू रुचाउने दर्शक स्रोताहरु छुट्टै किसिमका छन्। सायद अब आमेश र समिक्षाले संयुक्त रुपमा केही गीतहरू बजारमा ल्याउँछन् होला भन्ने अनुमान आमेशको स्टाटसबाट गर्न सकिन्छ।