काठमाडौं : भोलि बिहीबारदेखि प्रदर्शनमा आउन लागेको फिल्म ‘ज्याकी: आईएम ट्वान्टी वान’को ग्राण्ड प्रिमियर गरिएको छ। निर्माण टिमले राजधानीको वन सिनेमाज आइपिलेक्समा मंगलबार ग्राण्ड प्रिमियर गरेको हो।

प्रिमियर शो’मा अधिकांश फिल्मकर्मीहरुको बाक्लो उपस्तिथि थियो। प्रायः सबैजना उत्साहित भएर शो हेर्न आएका थिए। भव्य रुपमा गरिएको प्रिमियर शो हेरिसकेपछि फिल्मलाई तारिफ मिलेको छ।

अधिकांशले ‘ज्याकी: आईएम ट्वान्टी वान’ नयाँ कथामा बनेको प्रतिक्रिया दिएका छन्। त्यसो त, फिल्ममार्फत नयाँ कथालाई फरक शैलीमा उतारेकोमा फिल्मकी निर्देशक रेनाशा राई रानालाई प्रशंसा समेत गरेका थिए।

नायिका प्रियंका कार्की, केकी अधिकारी, निर्देशक प्रदीप भट्टराई, चलचित्र विकास बोर्डका अध्यक्ष भुवन केसी, नायिका रिमा विश्वकर्मा लगायतका दर्जनौं बढी फिल्मकर्मीले खुलेरै फिल्मको तारिफ गरेका थिए।

त्यसो त, मिडियाकर्मीबाट पनि फिल्मलाई राम्रो प्रतिक्रिया मिलेको छ। नेपालमा बन्दै आएका फिल्महरुको ट्रेन्ड यो फिल्मले तोडेको अधिकांशको भनाइ छ।

फिल्ममा धिरज मगर, जसिता गुरुङ, अरुण क्षेत्री, प्रेम सुब्बा लगायतका कलाकारको अभिनय रहेको छ। एउटा २१ बर्षको युवाको डान्सर बन्ने सपनाको कथालाई फिल्मले उठान गरेको छ।