काठमाडौं : नायिका पूजा शर्माको आज जन्मदिन। जन्मदिनको अवसरमा उनलाई अधिकांश चलचित्रकर्मीहरुले शुभकामना दिईरहेका छन्। पूजाका फ्यानहरुद्वारा पनि सामाजिक संजालमा शुभकामनाको ओइरो छ।

यसैबीच, नायक पल शाहले पनि आफ्नो फेसबुक पेजबाट जन्मदिनको शुभकामना दिएका छन्। उनले पूजा र आफू भएको केही तस्वीर सार्वजनिक गर्दै एउटा क्याप्सन समेत लेखेका छन्।

‘दुःख अनि सुखमा साथ दिने मेरो छायालाई जन्मदिनको मुरीमुरी शुभकामना। ह्याप्पी बर्थडे छाया’- पलले जन्मदिनको शुभकामना दिँदै फेसबुकमा लेखेका छन्। पलको उक्त पोस्टमा हजारौंले पनि पूजालाई जन्मदिनको शुभकामना दिएका छन्।

जेलबाट रिहा भएपछि पल र पूजाको सम्बन्ध राम्रो नभएको बजारमा हल्ला थियो। भाउ नदिएको भन्दै पलसँग पूजाको मनमुटाव सुरु भएको पनि गसिप बजारमा थियो। तर पलले आज दिएको शुभकामनाले चाहिँ सम्बन्धमा दरार न आएको स्पष्ट हुन्छ।

पलले जेल जीवन बिताइरहेको समयमा पूजाले एकदम साथ दिएकी थिइन्। पलको लागि आफ्नो प्रतिष्ठाको वास्तै नगरि लागिपर्ने कोही थियो भने पूजा नै हुन्। पूजाले पलको सपोर्टमा के-के मात्रै गरिनन् । पलको तस्वीर छापेर टिसर्ट लगाइनन् कि, विभिन्न मिडियामा अन्तर्वार्ता दिइनन् कि, आफ्नो तर्फबाट गर्ने सबै गरिन्।

कानुनी रुपमा बोल्न नहुने कुरा भएपनि पूजाले पल आफ्नो सच्चा साथी भएको भन्दै निरन्तर साथ दिइरहिन्। जेलबाट निस्केपछि पहिलो चलचित्र पलसँगै खेल्ने पनि पूजाको दाबी थियो। तर पछिल्लो समय बोलचाल नभएको हल्लाबीच पलले शुभकामना दिँदा सकारात्मक पाटो झल्किएको छ।