काठमाडौं : नेपाली फिल्म क्षेत्रमा नायिका रेखा थापालाई अब्बल नायिकाको रुपमा लिने गरिन्छ। एक समयमा फिल्ममा रेखालाई भ्याइनभ्याई हुन्थ्यो। विस्तारै आफै सिनेमा निर्माणमा लागेकी रेखाले एकपछि अर्को गर्दै फिल्म उद्योगको लागि हिट फिल्म दिइन। जसले गर्दा उनलाई ‘लेडी टाइगर’ भनेर पनि उपनाम दिइएको थियो।

तर पछिल्लो समय रेखा फिल्म निर्माणमा निकै निष्क्रिय बनिन्। बरु उनले आफ्नो पारिवारिक जीवनलाई बढुवा दिइन्। उनले पछिल्लो समयमै आफ्नो वैवाहिक जीवन अघि बढाइन। हाल भने रेखा नयाँ फिल्म निर्माणको तयारीमा छिन्। यही तयारीका बाबजुद विभिन्न फिल्महरुको विशेष शो’मा पनि उनी पुगिरहेकी हुन्छिन्।

सोमबार मात्रै फिल्म ‘प्रसाद २’को विशेष शो हेर्न पुगेकी रेखाले नायिका पूजा शर्मालाई आफ्नो हिरो रहेको बताएकी छिन्। ‘प्रसाद २’ हेरिसकेपछि मिडियाकर्मीसँग बोल्दै रेखाले आफ्नो फिल्ममा लेडिजलाई मात्र बढी प्राथमिकता दिने बताइन्। मुख्य पात्रदेखि लिएर कथासम्म लेडिजलाई प्राथमिकता दिने उनको भनाइ छ।

सोही क्रममा अब बन्ने आफ्नो नयाँ फिल्ममा पूजा शर्मा हिरो भएको पनि रेखाले बताइन्। संचारकर्मीहरुले तपाईंको फिल्ममा हिरो को हुनुहुन्छ नि ? भनेर प्रश्न गर्दा रेखाले भनिन्, ‘मेरो हिरो त पूजा होनि। अब अर्को हिरो खोजिरहेको छु। मेरो फिल्ममा स्क्रिप्ट, डिरेक्टर र पूजाहरु नै हिरो हो।’

रेखाको यस्तो तारिफ सुन्दा पूजा मख्ख थिइन्। सायद पूजाले आफ्नो फिल्म गर्न सजिलै राजी भएको भएर होला रेखाले आजभोलि पूजाको खुब तारिफ गर्छिन्। पूजा पनि रेखा थापालाई आइडल मान्छिन। रेखा थापा जस्तो स्ट्रोङ लेडी फिल्म उद्योगलाई चाहिने पूजा बताउँछिन्।

रेखासँग काम गर्न पाउने कुराले आफू निकै खुशी रहेको पूजाले बताइन्। ‘मैले अरु प्रोजेक्ट हेरेको छैन’, पूजाले मिडियाकर्मीहरुसँग भनिन् , ‘सिरिफ रेखा दिदि। किनभने मलाई ब्लास्ट गर्नुछ। हाम्रो नारी यति स्ट्रोङ छ कि हामी हिरो हुन पनि सक्छौं। यसरी हाम्रो गन्तव्य सुरुभएको छ र गर्छौं पनि।’

त्यसो त, रेखा र पूजाले ‘प्रसाद २’को खुलेर तारिफ गरेका थिए। रेखाले त ‘प्रसाद २’का निर्देशक सुदर्शन थापासँग काम गर्न इच्छुक रहेको र सुदर्शनको फ्यान भएको समेत बताएकी छिन्। ‘प्रसाद २’को सबै कुरा उत्कृष्ट लागेको रेखाको भनाइ छ।

यता रेखाले बनाउन लागेको नयाँ फिल्ममा नायिका आँचल शर्मा रहने निकै ठुलो हल्ला थियो। आँचलले रेखालाई भेटेको तर स्क्रिप्ट पढ्न नदिएपछि आँचलले काम गर्न इच्छा नदेखाएको अर्को हल्ला यतिबेला बजारमा छ। यस् विषयमा भने आँचलले स्क्रिप्ट नपढेर साइन गर्न इच्छुक नभएको स्पष्ट पारेकी छिन्।

रेखाले बनाउने नयाँ फिल्मलाई चाहिँ ज्ञानेन्द्र देउजाले निर्देशन गर्दैछन्। झन्डै लामो समयपछि फिल्म निर्माणमा फर्किएकी रेखाको नयाँ फिल्म कस्तो बन्छ होला भन्ने कौतुहलता सबैमा जागेको छ। पक्कै पनि रेखाको नयाँ फिल्म नारी प्रधान फिल्म होला भन्ने आँकलन चाहिँ गर्न सकिन्छ।