काठमाडौं : आइकोर फिल्म्सको व्यानरमा निर्माण भएको चलचित्र ‘ज्याकी : आईएम ट्वान्टी वान’को नयाँ गीत रिलिज गरिएको छ। निर्माण टिमले आइतबार ‘निदाउन मलाई’ बोलको गीत रिलिज गरेको हो

गीतमा कालिप्रसाद बास्कोटाको सुमधुर आवाज रहेको छ। गीतमा शब्द अनि संगीत पनि कालिप्रसाद बास्कोटाकै रहेको छ। वियोगान्त प्याटर्नमा आधारित छ गीत।

गीतको भिडियो लिरिकल छ। लिरिकल भिडियोमा यो चलचित्रका मुख्य पात्र धिरज मगर र जसिता गुरुङ निकै उदास छन्। आफ्नो सपना निकै प्यारो भएको र त्यही सपना देख्न निदाउन मन भएको कुरा गीतमा उल्लेख छ।

डान्सको कथामा आधारित यो चलचित्र नेपालको पहिलो हो। सुशान्त प्रजापतिको छायांकन, निमेष श्रेष्ठको सम्पादन, रेनशा राई राना र सोमनाथ खनालको संवाद चलचित्रमा रहेको छ।

रेनशा राई रानाको निर्देशनमा तयार भएको चलचित्र आगामी वैशाख २१ गतेबाट देशभर प्रदर्शन हुँदैछ। निर्माण टिमले चलचित्रको सम्पुर्ण पब्लिसिटी डिजाइन एवम् सामाग्रीको लागि रोयल भिमसेन (ट्राइडेन्ट कन्सेप्ट)लाई दिएको छ।

चलचित्रमा धिरज र जसिताका अलावा अरुण क्षेत्री, प्रेम सुब्बा, लुनिभा तुलाधर, पल्पसा डंगोल, राजु भुजु, सुजता राई लगायतका कलाकारको समेत अभिनय रहेको छ। चलचित्रमा जसिता ‘रुबी’को भुमिकामा रहेकी छिन्।