काठमाडौं : नयाँ वर्षको अवसर पारेर शुक्रबारबाट प्रदर्शनमा आएको चलचित्र ‘बुलाकी’लाई आइतबारदेखि हलबाट उतारिने भएको छ। शनिबार राति ‘बुलाकी’ निर्माताले एक स्टाटस लेख्दै आइतबारदेखि देशभरका हलहरुबाट चलचित्र उतार्ने घोषणा गरेका हुन् ।
चलचित्र राम्रो हुँदाहुँदै पनि हल व्यवसायीहरुले गरेको अपहेलना, प्राप्त शो अफटाइममा दिइएको, मोफसलका हलमा १ शो पनि नदिइएको, प्रदर्शनको दोस्रो दिनबाटै ७० प्रतिशत शो कटौती गरेको लगायतका कारण देखाउँदै आइतबारदेखि नै हलबाट प्रदर्शनरत चलचित्र उतार्ने निर्णय लिएको निर्माता बिराज बिष्टले स्टाटसमा उल्लेख गरेका छन् ।
फर्स्टलुक पोस्टर, टिजर, गीत रिलिज, ट्रेलर सबै आउट भइसक्दा पनि प्राप्त हाइपलाई वेवास्ता गर्दै अग्रिम बुकिङमै न्यून शो दिइएको गुनासो पनि निर्माता विष्टले व्यक्त गरेका छन्।
‘अब हाम्रो चलचित्र दर्शकको माग अनुसार परिस्थिति हेरेर प्रोजेक्टरबाट चोकचौतारा समेत देखाउने छौं’, निर्माता बिष्टले लेखेका छन्, ‘यसैपनि काठमाडौंले अबहेलना गरेको कर्णाली र सूदूरपश्चिमको कथा उठाएर करोडौं रिस्क लिँदै चलचित्र बनाउँदा फिल्म क्षेत्रले समेत सोही व्यबहार दोहोर्याएको छ । यो बीचमा नयाँ मेकरको रूपमा पाइला राख्दा पहिलो पाइला मै साथ, सहयोगसहित हौसला प्रदान गर्नुहुने यहाँ सम्पूर्णमा कृतज्ञ छौं।’
साथै, चलचित्र मार्फत देश, समाज र माटो बोल्ने अझै धेरै कथा लिएर दर्शकमाझ आउने र आफू थाकेको तर नहारेको निर्माता बिष्टले बताएका छन्।
जे होस्, दर्शकबाट राम्रो प्रतिक्रिया आउँदा आउँदै पनि शो घटाउँदै लग्नु भनेको पक्कै पनि राम्रो होइन।
लक्ष्मण सुनार निर्देशित ‘बुलाकी’मा सुरक्षा पन्त, नरेन खड्का, बिराज बिष्ट लगायतका कलाकारहरुको अभिनय रहेको छ।
