काठमाडौं : नयाँ वर्षसँगै आगामी वैशाख २१ गतेबाट प्रदर्शनमा आउन लागेको चलचित्र ‘ज्याकी : आइएम ट्वान्टी वान’को पर्खाइमा छन् दर्शक यतिबेला।फर्स्टलुक पोस्टरबाटै दर्शकको मन जितेको यो चलचित्रको ट्रेलरपछि झन् कौतुहलता बढेको छ।

निर्माण टिमले शुक्रबार मात्रै ट्रेलर रिलिज गरेको छ। काठमाडौंमा एक कार्यक्रमबीच ३ मिनेट १६ सेकेन्डको ट्रेलर ‘आइकोर फिल्म्स’को युट्युब च्यानलबाट निर्माण टिमले रिलिज गरेको हो।

ट्रेलरमा बुवाको सपना पूरा गर्नको लागि धिरज मगरले आफ्नो सपना त्याग्दै ब्रीटिस आर्मीमा भर्ती हुन पुगेका छन् । एउटा चर्चित डान्सर बनिसकेका धिरज (ज्याकी लिम्बू) बुवाको सपना पूरा गर्नकै लागि आफ्नो लक्ष्यलाई थाती राख्दै भर्ती हुन तल्लीन देखिएका छन् ट्रेलरमा।

त्यसो त रुबीको भुमिकामा रहेकी जसिता गुरुङको पनि डान्सर बन्न गरेको संघर्ष ट्रेलर झल्किन्छ। धिरज र जसिताको प्रेम सम्बन्धलाई पनि ट्रेलरमा अटाइएको छ। यी दुबैले डान्सर बन्न गरेको औधी मिहेनत पनि देखाइएको छ।

रेनशा वान्तवा राई निर्देशित यो चलचित्रमा धिरज र जसिता मुख्य भुमिकामा रहेका छन्। डान्सको कथामा आधारित यो चलचित्र नेपालको पहिलो हो। सुशान्त प्रजापतिको छायांकन, निमेष श्रेष्ठको सम्पादन, रेनशा राई राना र सोमनाथ खनालको संवाद चलचित्रमा रहेको छ।

चलचित्र आईकोर फिल्मसको ब्यानरमा निर्माण भएको हो। निर्माण टिमले चलचित्रको सम्पुर्ण पब्लिसिटी डिजाइन एवम् सामाग्रीको लागि रोयल भिमसेन (ट्राइडेन्ट कन्सेप्ट)लाई दिएको छ।

चलचित्रमा धिरज र जसिताका अलावा अरुण क्षेत्री, प्रेम सुब्बा, लुनिभा तुलाधर, पल्पसा डंगोल, राजु भुजु, सुजता राई लगायतका कलाकारको समेत अभिनय रहेको छ। चलचित्रमा जसिता ‘रुबी’को भुमिकामा रहेकी छिन्।