काठमाडौं : टिकटकबाट चर्चामा आएकी पबित्रा साकी अर्थात् मिस पबीले अभिनेता पल शाहसँग म्युजिक भिडियोमा जोडी बाँधेकी छिन् । पल शाह जेलमा रहेको बेला विभिन्न मिडियामा अन्तर्वार्ता दिनेक्रममा पल शाहसँग म्युजिक भिडियो खेल्ने आफ्नो ठूलो सपना रहेको बताउँदै आएकी थिइन् ।
अन्ततः मिस पबीको पलसँग एउटै स्क्रिनमा देखिने अर्थात् संगै जोडी भएर भिडियोमा अभिनय गर्न सपना पूरा भएको छ। उनले ‘थाहै भएन’ बोलको म्युजिक भिडियोमा पल र मिस पबीको आकर्षक जोडी दर्शकले देख्न पाउनेछन्।
उक्त गीतमा लोकप्रिय गायक हिमाल सागरको आवाज रहेको बताइएको छ। त्यसो त, पल र मिस पबीको जोडी तस्वीर हिमालले नै फेसबुकमा सार्वजनिक गरेका हुन्। छायांकन स्थलमा खिचिएका केही तस्वीरहरु आफ्नो फेसबुक अकाउन्टबाट सार्वजनिक गर्दै ‘थाहै भएन’ बोलको आफ्नो गीतमा पल र मिस पबीको जोडी रहने कुरा हिमालले औपचारिक जानकारी दिएका हुन् ।
पल र मिस पबीको तस्वीरमा हजारौं लाइक र कमेन्ट आएका छन् । जहाँ मिस पबी र पलका शुभचिन्तकले यस् दुई कलाकारलाई एकैफ्रेममा देख्न पाउने भएपछि खुशी व्यक्त गरेका छन्। त्यसो त मिस पबी र पलले पनि एकअर्का सँगै रहेको तस्वीर फेसबुकमा सार्वजनिक गरेका छन्।
‘पल शाहसँग भिडियो खेल्ने ठूलो सपना पूरा भएकोमा बधाई छ मिस पबी’, भन्दै मिस पबीका हजारौं फ्यानहरुले फेसबुकमा कमेन्ट समेत गरेका छन् । धेरैले यो भिडियोको प्रतीक्षा गरिरहेको बताएका छन् ।
पल र मिस पबीले जोडी बाँधेको भिडियो छिट्टै रिलिज हुन लागेको बताइएको छ। आफुलाई सबैभन्दा बढी मनपर्ने नायक एवम् मोडलसँग मिस पबीले पहिलोपटक म्युजिक भिडियोमा काम गरेकी हुन्।
पलसँग काम गरेको भिडियो रिलिज भयो भने मिस पबीलाई झन् अन्य धेरै म्युजिक भिडियोको अफर आउने लगभग निश्चित नै छ।
