काठमाडौं : झन्डै १ बर्षको जेल जीवन बिताएका अभिनेता पल शाह केही हप्ता अघि मात्रै सफाई पाएर रिहा भएका थिए। रिहा भएको केही समय घरमै रहेर आराम गरेका पल अब भने पुरानै दैनिकीमा फर्किन थालेका छन् ।
बुधबार मात्रै पल रुकुममा जारी एक महोत्सवमा सहभागी हुन पुगे। हेलिकप्टर मार्फत रुकुम पुगेका पललाई भव्य स्वागत गरियो।
पल आउने खबरले बुधबार रुकुम महोत्सवको स्टेज दर्शकले भरिभराउ थियो। झन्डै ३० हजार दर्शक पललाई हेर्न पुगेका थिए। जब पल स्टेजमा उक्लिए, तब दर्शकले ताली र हुटिङ सहित ‘पल शाह जिन्दावाद’ भन्दै नारा लगाए।
पलले पनि दर्शकको मायालाई स्वीकार गर्दै स्टेजमा आफ्नो प्रस्तुति राखे। उनले आफ्नै चलचित्र ‘म यस्तो गीत गाउँछु २’ गीत ‘तिम्रो घरको वरिपरि’मा नाँचेर दर्शकलाई मनोरञ्जन दिएका थिए।
त्यसो त, पलले आफ्नो नृत्य प्रस्तुत गरेपछि रुकुमेली दर्शकलाई धन्यवाद दिँदै आफ्नो केही कुरा समेत स्टेजमै राखे।
‘जेल बाहिर आइसकेपछिको पहिलो फिल्म कुन गर्दै हुनुहुन्छ ?’ भन्ने प्रश्न पललाई स्टेजमै सोधिएको थियो। यश प्रश्नको जवाफ पलले दर्शकसँग मागे।
‘अब कुन फिल्म गर्दा ठिक होला ?’ पलले दर्शकतिर माइक तेर्साउँदै भनेँ , ‘अब चाहिँ यस्तो हुन्छ, बल्ल म तपाईंहरुमाझ नजिक हुँदैछु। म्युजिक भिडियो गर्छु पहिला। म्युजिक भिडियो आउँदैछ, मेरै पल शाह अफिसियल युट्युब च्यानलबाट। त्यो हेरिदिनुहोला।’
जब पलले अब कुन फिल्म गर्दा ठिक होला भनेर दर्शकलाई सोधे, त्यतिबेला चाहिँ दर्शकले ‘म यस्तो गीत गाउँछु ३’ भनेर एकै स्वरमा भनेका थिए।
तर पलले अब म्युजिक भिडियोबाट छिट्टै दर्शकमाझ आउन लागेको बताए। चर्चित गीत ‘तिमीलाई हेर्ने बानी पर्यो’को फिमेल भर्सनबाटै पल दर्शकमाझ आउँदैछन् । जुन गीत पल शाहले आफ्नै च्यानलबाट बजारमा ल्याएका थिए।
यता फिमेल भर्सनलाई पनि पलले आफ्नै च्यानलबाट ल्याउँदैछन् । मेल भर्सनमा पुष्पन प्रधानको स्वर रहेको थियो भने फिमेल भर्सनमा अन्नु चौधरीको स्वर रहने बताइएको छ।
पल बुधबार नै रुकुम महोत्सवमा आफ्नो प्रस्तुति सक्काएर हेलिकप्टर मार्फत काठमाडौं फर्किएका थिए। पलको साथमा बहिनी रोशनी पनि संगै गएकी थिइन् ।
