काठमाडौं : प्रेम सम्बन्धमा ‘प्रेम’ हुन्छ। ‘घृणा’ हुन्छ, ‘मनमुटाव’ हुन्छ। कहिलेकाहीँ प्रेम सम्बन्धमा ‘बदला’को भाव पनि हुन्छ। हो, यही बदलाको भाव झल्काउने एउटा गीत यतिबेला बजारमा छ।
गीत केही दिन अघि रिलिज भएको हो। गीतको बोल छ ‘तिम्रो घरबार’। मौलिक गायक प्रेम सापकोटा ‘सोनु’ र गायिका शान्ति श्री परियारको गीतमा मर्मस्पर्शी स्वर रहेको छ।
गीतको शब्द याम प्रसाद निउरेले लेखेका हुन्। गीतको मेलोडी भने युवा सर्जक आयान न्यौपानेले तयार गरेका हुन्। गीतको म्युजिक अरेन्जमेन्ट गर्ने काम चाहिँ आकाश मगरले गरेका छन्।
‘राखेकीले ३/४ साल अल्झार
नदेउ चोट विगतलाई बल्झार’
‘पर्यो भने रुँदै हिन्न म
मेरो घरबार बिगार्यौ भने त
तिम्रो घर नि बन्न दिन्न म’
यि माथीका शब्दहरू ‘तिम्रो घरबार’ गीत भित्रका हुन्। यि शब्दहरु सुन्ने बित्तिकै जोकोहीलाई लाग्छ कि प्रेम सम्बन्ध सफल नभएपछि एक-अर्कालाई दिइने धम्कीका बाणीहरु हुन् भनेर।
बजारमा आइरहेका गीतहरू भन्दा नितान्त फरक लाग्छ यो गीत। अझ भनौं यस्तो विषय वस्तुमा बनेका कमै गीतहरुको लिस्टमा पर्छ यो गीत। अलि बेग्लै विषयलाई गीतकार निउरेले यो गीतमा उतारेका छन्।
गीतका शब्द अनुसार मेलोडी पनि सुहाउने खालको छ। प्रेम र शान्तिश्रीको गायिकीले गीतको शब्द अनि मेलोडीलाई न्याय गरेको छ।
यो समाचार तयार पार्दासम्म गीत रिलिज भएको ६ दिन भयो। तर यो गीतलाई युट्युबमा त्यति राम्रो भ्युज छैन। हालसम्म जम्मा ५५ हजार भ्युज मात्रै छ। तर प्रतिक्रिया भने राम्रै मिलेको छ गीतलाई।
गीतलाई जति भ्युज मिल्नु पर्थ्यो अथवा जति रुचाइनु पर्थ्यो, त्यति भ्युज नमिल्नुको कारण भिडियो पनि होकि जस्तो लाग्छ। किनकी गीतले उठान गरेको विषयलाई भिडियोमा देखाइएको छैन।
जून कथामा भिडियो बन्नु पर्थ्यो, त्यो कथामा भिडियो बनाइएको छैन। सामान्य छ भिडियो। कलाकार लोमश शर्मा र अस्मिता रनपाल भिडियोमा फिचर्ड छन्।
पछिल्लो समय यि दुबै कलाकारलाई दर्शकले रुचाइएका छन् । यत्तिको कलाकार भिडियोमा राखिसकेपछि निर्देशकले गीतले मागेको कथा भिडियो मार्फत पस्किन सक्नुपर्थ्यो। तर त्यसो छैन।
सामान्य रुपमा समुहमा कोरश कलाकार माझ मुख्य कलाकार राखेर चौवर मै भिडियो सक्काइएको छ। यस्तो हुनुमा कि त निर्माताले भिडियोको बजेटमा निकै कन्जुस्याइँ गरेको हुनुपर्छ । या त, निर्देशकले अल्छि गरेको हुनुपर्छ।
जे होस्, प्रेम सम्बन्धमा पनि उब्जिएको बदलाको भावमा बनेको गीतलाई भिडियोमा न्याय गरेको भए सायद गीतको अडियोसँगै भिडियोलाई पनि अलि रुचाइन्थ्यो।
भिडियोलाई कुमार केसीले निर्देशन गरेका छन्। दिनेश पराजुलीले भिडियो खिचेका हुन् । अमृत चापागाईंले भिडियो सम्पादन गर्ने काम गरेका छन्। गीत गायक प्रेम सापकोटा ‘सोनु’को युट्युव च्यानलबाट रिलिज गरिएको हो।
रिलिज पूर्व निर्माण टिमले गीतबाट जुन अपेक्षा गरेको थियो, त्यो अपेक्षा पूरा भएन। त्यसो त, गीतलाई व्यवसायीक तरिकाले भन्दा पनि आफ्नो निरन्तरता र आत्मसन्तुष्टिको रुपमा लिने यसै गीतका गायक सापकोटाको भनाइ छ।
विशेषगरी लोक तथा दोहोरी गीतहरुको भिडमा केही नयाँ गर्नुपर्छ भन्ने मान्यता राखेर यो गीत सृजना गरेको गीतकार निउरे बताउँछन्। त्यस्तै, नयाँ नयाँ भाकाहरु आफुले प्रयोग गर्ने क्रममा यो गीतको भाका सृजना गरेको आयान न्यौपानेले बताए।
आगामी दिनमा पनि अन्य धेरै सृजनाहरु दर्शक स्रोतामाझ ल्याउने तयारी गरिरहेको ‘तिम्रो घरबार’ टिमले जनाएको छ।
रोचक कुरा त के छ भने, यो गीतमा आबद्ध गायक सापकोटा, गीतकार निउरे र संगीतकार न्यौपाने हाल नेपाल बाहिर नै छन् । तर पनि गीत संगीतको प्रेमले गर्दा उनीहरुले प्रवासमा रहेर पनि गीत संगीतमा निरन्तरता भने दिइरहेका छन्। जुन कुरा निकै सराहनीय छ।
