काठमाडौं : पछिल्लो समयकी व्यस्त र लोकप्रिय गायिका हुन् एलिना चौहान। उनले गाएको ‘धोकेबाज’ बोलको गीत त यतिबेला यत्रतत्र सर्वत्र चर्चित छ।
यही गीतले एलिनलाई पछिल्लो समय निकै व्यस्त बनायो। ‘धोकेबाज’ गीतले चर्चा बटुली रहँदा यही गीत गाउने गायिका एलिना चौहानको प्रेम सम्बन्धले समेत चर्चा पाइरहेको छ यतिबेला ।
हाल एलिना सांगीतिक कार्यक्रमको लागि अष्ट्रेलियामा छिन् । केही दिन अधि एलिना अष्ट्रेलिया गएकी हुन् । अष्ट्रेलियामा रहिरहँदा एलिनाले एक युवकसँग बनाएका टिकटकहरु आफ्नो टिकटक अकाउन्टबाट पोस्ट गरिरहेकी छिन् ।
ती युवक हुन् बागलुङका विष्णु सापकोटा। हो, यिनै विष्णु सापकोटासँग एलिना प्रेम रहेको चर्चा छ। विष्णु अष्ट्रेलिया बस्न थालेको धेरै भयो। विष्णुले पनि गीत गाउँछन, गीत लेख्छन् पनि।
विशेषगरी ‘मायालु इन्टरटेन्मेन्ट’ युट्युब च्यानलका संचालक हुन् विष्णु। गत तिज कार्यक्रममा अष्ट्रेलिया जाँदा एलिना र विष्णुको भेटघाट भएको र त्यही भेटबाट दुबैजना नजिक भइ हाल प्रेममा रहेको बताइएको छ।
हाल एलिनाले टिकटकमा पोस्ट गरेका भिडियोबाटै थाहा हुन्छ कि यी दुई प्रेममा छन् भन्ने कुरा। ‘ब्युटिफुल कपल, नाइस जोडी, क्युट कपल’ लगायतका सयौं कमेन्ट एलिनाका नजिकका शुभचिन्तकले टिकटकमा गरेका छन् ।
त्यस्तै, एलिनाले प्रयोग गर्ने एउटा ह्यासट्याग छ, जुन ह्यासट्याग हो #albisa55 । एलिनाले यो ह्यासट्याग प्रयोग गर्न थालेको धेरै भयो। दुबैको नामबाट तयार पारिएको यो ह्यासट्यागबाट पनि अनुमान गर्न सकिन्छ कि यी दुई प्रेममा छन् भन्ने कुरा। बुझिए अनुसार यि दुईले छिट्टै विवाह समेत गर्दैछन् ।
एलिना र विष्णुले केही गीतमा सहकार्य समेत गरेका छन् । केही महिना अघि बजारमा आएको ‘बाजा तालमा’ बोलको गीतमा एलिना र विष्णुले युगल आवाज दिएका छन् ।
सुन्नामा आए अनुसार विष्णुले यो गीतको निर्माणको सबै जिम्मेवारी एलिनालाई दिएका थिए रे। यत्ति सम्मकी यो गीतको भिडियोमा आबद्ध कलाकारहरुलाई पारिश्रमिक एलिनाकै हातबाट दिइएको थियो रे।
यो गीतको भिडियोमा सामारिका ढकाल, स्मारिका ढकाल, विजय पुन र जिवेश गुरुङको अभिनय रहेको छ। गीत विष्णुले आफ्नै च्यानल ‘मायालु इन्टरटेन्मेन्ट’बाट सार्वजनिक गरेका थिए।
त्यसो त, विष्णुले पनि एलिनासँग बनाएका ड्युट टिकटक भिडियो बेलाबेला आफ्नो टिकटक अकाउन्टबाट अपलोड गरिरहेका हुन्छन् । त्यहाँ पनि उनका नजिकका आफन्तले मिलेको जोडी भनेर कमेन्ट गरिरहेका हुन्छन् ।
जे होस् सेलिब्रेटीको प्रेम सम्बन्ध बाहिरिनु खासै नौलो कुरा भने होईन । तरपनि कुनै सेलिब्रेटीको प्रेम सम्बन्ध बाहिरियो भने, त्यो सम्बन्धले सार्थकता पाओस् भन्ने अपेक्षा चाहिँ जनमानसमा हुन्छ।
झापाकी एलिना छोटो समयमै लोकप्रिय हुने गायिकामा पर्छिन्। सुरुवाती दिनमा कभर गीत गाउँदै सांगीतिक यात्रा थालनी गरेकी एलिनालाई पछिल्लो समय गीत गाउन रेकर्डिङ स्टुडियोमा भ्याइनभ्याई हुन्छ।
रेकर्डिङका अलावा स्टेज कार्यक्रममा पनि एलिनाको व्यस्तता उस्तै छ। ‘धोकेबाज’ बोलको गीत भाइरल भएपछि त एलिनाले देश विदेशका स्टेज कार्यक्रममा निरन्तर प्रस्तुति दिइरहेकी छिन्।
सोही अनुरुप स्टेज कार्यक्रमकै सिलसिलामा हाल एलिना अष्ट्रेलियामा छिन्। केही कार्यक्रममा प्रस्तुति दिइसकेकी एलिनाले अझै अष्ट्रेलियाका विभिन्न शहरहरुमा आयोजित कार्यक्रममा प्रस्तुति दिनेछिन्।
अष्ट्रेलियाका सबै सांगीतिक कार्यक्रम सकाएर एलिना नेपाल फर्किने बताइएको छ। नेपालमा जस्तै एलिनालाई अष्ट्रेलियामा पनि दर्शकको साथ उल्लेख्य मिलिरहेको छ।
