नेपालगन्ज : यतिबेला हलमा आक्रमक व्यापार गरिरहेको चलचित्र ‘छक्का पन्जा ४’ हेर्न आउने दर्शकको भिड नेपालगन्जमा बढ्दो छ।

गत शुक्रबारबाट प्रदर्शनमा आएको यस् चलचित्रलाई नेपालगन्जमा सुरुदेखि नै दर्शकको साथ अथाह छ। बुधबार त झन् हलमा दर्शकको मेला लागेको थियो।

दर्शकको भिडले नेपालगन्ज स्थित क्युएफक्स बागेश्वरी सिनेमाज प्राङ्गणमा भरिएको थियो। खुट्टा टेक्ने ठाउँ समेत थिएन। बुधबार दिइएका ७ वटै शो’हरु हाउसफुल भएका छन् ।

अधिकांश दर्शकहरु टिकट नपाएर निराश भइ फर्किएको हलका प्रबन्धक सन्जिव शाक्यले बताए। प्रबन्धक शाक्यका अनुसार दिनानुदिन ‘छक्का पन्जा ४’ हेर्न आउने दर्शकको संख्या बढिरहेको छ। हालसम्म नेपालगन्जमा मात्रै २७ लाख बढीको ग्रस कलेक्सन गरेको बताइएको छ।

कमेडी र राजनीति बेथितिको बारेमा बनेको ‘छक्का पन्जा ४’ मा दिपकराज गिरीको कथा र लेखन रहेको छ। चलचित्रलाई हेमराज बिसीले निर्देशन गरेका हुन् ।

यो चलचित्रका कार्यकारी निर्मातामा केदार घिमिरे र निर्मल शर्मा रहेका छन् । त्यस्तै, दिपेन्द्र खानिया र केशव न्यौपाने निर्मातामा रहेका छन् ।

चलचित्रमा दिपकराज गिरी, दिपाश्री निरौला, बेनिशा हमाल, राज आचार्य, बुद्धि तामाङ, केदार घिमिरे, निर्मल शर्मा लगायतका कलाकारहरुको अभिनय रहेको छ।