काठमाडौं : थोरै गीत गाएर पनि दर्शकको नजरमा अटाएका गायक हुन् रवि कार्की। उनले गाएका गीतहरू बजारमा थोरै मात्र सार्वजनिक छन् । तर थोरै गीत भएपनि कार्कीलाई दर्शक स्रोताको साथ राम्रो छ।

लोक गीत संगीतमा मौलिक गीत मार्फत दर्शक स्रोतामाझ प्रस्तुत हुनुपर्छ भन्ने सोच बोकेका गायक कार्की एक अब्बल सर्जक पनि हुन्। उनले सृजना गरेका गीतहरू पनि दर्शकमाझ लोकप्रिय छन् ।

त्यसो त, कार्कीले सुरुवाती चरणमा गीत संगीतसँगसँगै कमेडी यात्रालाई पनि अगाडी बढाएका थिए। म्याग्दीका कार्कीले म्याग्दी कै विभिन्न टेलिभिजनमा प्रसारित हुने टेलिसियलमा अभिनय गर्थे।

सायद त्यसकै प्रभाव हुनुपर्छ कार्कीले पछिल्लो समय गाएको क्यारेक्टरमा आधारित एउटा लाइभ दोहोरी निकै चर्चामा छ। ‘बाग्लुङ पन्चकोट’ बोलको गीतमा गाएको दोस्रो भागलाई दर्शक स्रोताले नोकै रुचाएका छन् पछिल्लो समय।

इनेपाल खबरको प्रस्तुति रहेको यो दोहोरीमा रविले जडिया क्यारेक्टरमा दोहोरी गाएका छन् । जाँड खाएपछि गाउँघरमा गाइने दोहोरी शैलीमा प्रस्तुत हुने एक जडिया व्यक्तिको भुमिका निर्वाह गर्दै रवि प्रस्तुत छन् ।

जुन गीतलाई युट्युबमा छोटो समयमै राम्रो भ्युज मिलेको छ। यो समाचार तयार पार्दासम्म ९ दिनको अवधिका करिव २० लाख बढी भ्युज, ३७ हजार बढी लाइक र १५ सय बढी सकारात्मक कमेन्ट ‘इनेपाल खबर अफिसियल’को युट्युवमा देख्न सकिन्छ।

रविले उक्त दोहोरी माया गुरुङ, श्याम राना, रेजिना परियार, अस्मिता डल्लाकोटी र सुमन परियारसँग गाएका छन् ।युट्युबमा मात्र नभएर टिकटकमा पनि उत्तिकै चर्चा छ यो दोहोरीको। जहाँ रविको क्यारेक्टर र गायनलाई निकै प्रशंसा गरिएको छ।

त्यसो त, रविले जडिया क्यारेक्टरमा दोहोरी गाउन कसरी पुगे त ? भन्ने कुरा अलि रोचक पनि छ। इनेपाल रोधीका संचालक राजन क्षेत्री केही महिना अघि अमेरिकाबाट जन्मथलो बाग्लुङ आएका थिए।

सोही समयमा करिब ५० जना बढी लोकप्रिय कलाकारहरु लिएर राजनले आफ्नो जन्मभुमि बाग्लुङको धार्मिक एवम् पर्यटकीय स्थल पन्चकोटलाई प्रचारप्रसार गर्ने उद्देश्यले इनेपाल रोधीघरको लागि धेरै एपिसोडहरु छायांकन गराएका थिए।

त्यही एपिसोड मध्य ‘बाग्लुङ पन्चकोट’ बोलको दोहोरीको अन्तिममा रमाइलोका लागि राजनको आग्रहमा रविले ३ टुक्का दोहोरी गाएका थिए। अन्ततः तिनै टुक्काहरु भाइरल हुन पुगे ।

थोरै टुक्काहरुलाई दर्शक स्रोताले अत्याधिक रुचाएपछि निर्माण टिमले दोस्रो भाग पनि दर्शक स्रोतामाझ ल्याएको इनेपाल रोधीका संचालक क्षेत्रीले जानकारी दिए। अब छिट्टै तेस्रो भाग पनि ल्याउने तयारी भईरहेको उनले बताए।

जे होस् , गीत लेख्ने, मीठो आवाजमा गाउने मात्रै नभएर कमेडी सँगै क्यारेक्टरमा रहेर अब्बल दोहोरी गाउन सक्ने रवि कार्की भर्सटाइल कलाकार हुन् भन्दा फरक पर्दैन।