काठमाडौं : करिब १ दशक बढी समय भयो सर्जक नारायण कँडेलले जापानलाई कर्मथलो बनाउन थालेको। अब्बल सर्जकको रुपमा नेपाली सांगीतिक क्षेत्रमा पहिचान बनाएका कँडेलले गीत लेख्न थालेको पनि लामै समय भयो।
विशेषगरी लोक तथा दोहोरी गीत सृजना गर्छन् कँडेल। बसाई जापान भएपनि उनको मन मस्तिष्क भने गीत संगीतमै हुन्छ। त्यसैले त जापनबाटै धेरै गीत सृजना गरेर कँडेलले बजारमा ल्याइसकेका छन् । त्यसो त, २० वर्ष बढी भयो उनले गीत सृजना गर्न थालेको।
संख्यात्मक भन्दा पनि गुणात्मक गीत सृजना गर्नुपर्छ, गीत संगीतमा केही फरकपन दिनुपर्छ भन्ने धारणा राख्ने कँडेलले आफ्ना हरेक सृजनामा पृथकपन दिने कोशिस गरेका हुन्छन् ।
‘यस्तै छ कहानी’, ‘हरेक दिन नेपाली परदेशमा रुन्छ’,’सलामी’, ‘आफ्नोपन’, ‘उतै जान पर्छ’, ‘गल्ती’ लगायतका दर्जनौं लोकप्रिय गीतहरु सृजना गरेत बजारमा ल्याइसकेका उनले हालै पनि एउटा नयाँ गीत बजारमा ल्याएका छन् ।
केही दिन अघि ‘चिसो सिरानी’ बोलको गीत कँडेलले आफ्नै युट्युब च्यानलबाट बजारमा ल्याएका हुन् । गीतमा लोकप्रिय गायक कुशल बेलबासे र गायिका शान्तिश्री परियारको मनछुने आवाज रहेको छ।
यो गीतमा उनले उत्कृष्ट शब्द लेखेका छन् । प्रेम सम्बन्धमा रहेका प्रेमिल जोडी दुरीका हिसाबले टाढा हुँदा एकअर्काको मनमा उत्पन्न हुने भावलाई कँडेलले शब्दमा उतारेका छन् ।
यो गीत सुरुदेखि अन्तिमसम्म सुन्दा साहित्यिक भाव झल्किन्छ। त्यसो त, गीत पनि साहित्यक तरिकाले लेख्न सकिन्छ भन्ने उदाहरण समेत हुन् कँडेल। जसले गर्दा गीतलाई थप उत्कृष्ट बनाउन मद्दत पुर्याउँछ। कँडेल भन्छन् , ‘गीत चलोस, नचलोस तर पनि फरक ट्रेन्ड ल्याउन मैले कोशिश गरिरहन्छु। बरु मैले ल्याएको ट्रेन्डलाई पछ्याएर अरुले सृजना गरेको गीत चलोस भन्ने चाहान्छु।’
‘चिसो सिरानी’मा उनका शब्दहरुमा न्याय दिने मेलोडी बनाएका छन् कुशलले। उत्कृष्ट शब्द र संगीतको समायोजन रहेको गीतमा कुशल र शान्तीश्रीको गायिकीले झन् उत्कृष्टता थपेको छ।
सुन्दा अडियोले जति मन हुन्छ, हेर्दा भिडियोले झन् भावुक गराउँछ। एक एकल नारी र कुनै संस्था मार्फत गाउँमा प्रौढ शिक्षा पढाउने शिक्षकबीचको प्रेम सम्बन्धलाई भिडियोमा देखाइएको छ।
जुन गाउँमा एकल नारी हुन्छिन् त्यो गाउँमा केही समय अनपढ नारीहरुलाई पढाइरहेको समयमा एकल नारी र शिक्षकबीच प्रेम सम्बन्ध प्रगाढ बन्छ। जब शिक्षक उक्त गाउँ छोडेर अर्कै गाउँमा सरुवा भएर जान्छन् त्यसपछि दुबैजनालाई एक अर्काको माया झन् लाग्छ।
यो कथामा कलाकार टीका सानू र कुशल बेलबासेले उत्कृष्ट अभिनय निभाएका छन् । उनीहरुको अभिनय जीवन्त लाग्छ भिडियोमा। साँच्चिकैका जोडी लाग्छन् टीका र कुशल। त्यसो त, कुशक र टिकाका अलवा कलाकार प्रकाश घिमिरेको भिडियोमा अभिनय रहेको छ।
भिडियोको परिकल्पना र निर्देशन बिनोद भण्डारीले गरेका हुन् । सहायक निर्देशकको रुपमा विशाल घिमिरे छन् । गीतको भावलाई थप उत्कृष्ट बनाउने कथालाई निर्देशकले भिडियोमा उतारेका छन् ।
भिडियोलाई नवराज उप्रेतीले आकर्षक फ्रेममा खिचेका छन् । भिडियोको सम्पादन र रंग संयोजन गर्ने काम चाहिँ मनोज कार्कीले गरेका हुन् ।
रिलिज भएदेखि एक खालको प्रशंसा पाएको यस् गीतलाई हालसम्म २ लाख १९ हजार बढी भ्युज युट्युबमा मिलेको छ भने सयौं सकारात्मक प्रतिक्रिया पनि दर्शकले कमेन्ट सेक्सनमा दिएका छन् ।
