नेपालगन्ज : रमेश एमके पौडेलको डेव्यू निर्देशनमा तयार भएको चलचित्र ‘तिम्रो मेरो साथ’ आज शुक्रबारबाट देशभर प्रदर्शनमा आएको छ। चलचित्रले राजधानी लगायत मोफसलमा हलमा राम्रो शो पाएको छ।

साम्राज्ञी आर एल शाह र पुष्प खड्का स्टारर यस् चलचित्रको प्रचारप्रसार व्यापक गरिएको थियो। केन्द्र लगायत मोफसलमा पनि टिमले राम्रो प्रचारप्रसार गरेको थियो।

लभस्टोरी जनरामा आधारित यस् चलचित्रका लेखक एवम् कार्यकारी निर्माता सबिर श्रेष्ठ हुन् । त्यस्तै निर्मातामा पासाङ लामा, अर्नव पौडेल, आर्यन पौडेल रहेका छन् भने सह-निर्माताको रुपमा निरु भण्डारी, अशोक पोखरेल, सुमन पौडेल र सुधिर पराजुली रहेका छन् ।

आर्यन फिल्मस तथा बोधी एचडी अमेरिकाको संयुक्त ब्यानरमा निर्माण गरिएको चलचित्रमा साम्राज्ञी र पुष्पका अलवा सरोज खनाल, सन्दीप क्षेत्री, इमिली लामा लगायतका कलाकारहरुको समेत अभिनय रहेको छ।

चलचित्रलाई शिव ढकालले खिचेका हुन् भने भुपेन्द्र अधिकारीले सम्पादन गरेका छन् । साम्राज्ञी र पुष्पले संगै स्क्रिन सेयर गरेको यो तेस्रो चलचित्र हो।

यस् अघि चलचित्र ‘मंगलम’, र ‘मारुनी’मा साम्राज्ञी र पुष्पले संगै काम गरिसकेका छन् । ‘मारुनी’मा जस्तै ‘तिम्रो मेरो साथ’मा पनि दर्शकले साथ दिने पुष्प र साम्राज्ञीको विश्वास छ। अब दर्शकले यो जोडीलाई ‘तिम्रो मेरो साथ’मा कत्तिको रुचाउने हुन् त्यो त केही दिन पर्खिनै पर्छ।

त्यस्तै, आजैबाट अर्को नेपाली चलचित्र ‘गुन्जन’ पनि प्रदर्शनमा आएको छ। अष्टमान महर्जनको निर्देशनमा बनेको यस् चलचित्रमा सरोज खनाल, सारा श्रीपाली, हिउवाला गौतम, प्रीतमराज सेन्चुरी लगायतका कलाकारको अभिनय रहेको छ।

‘गुन्जन’का लेखक महेश दवाडी हुन् । हिराकाजी शाही र सुनिता शाही चलचित्रको निर्माताको रुपमा रहेका छन् ।

यसरी दुई चलचित्र एकसाथ भिड्दा पक्कै पनि दुबै चलचित्रलाई असर पर्ने देखिन्छ। जे होस्, दुबै चलचित्रलाई दर्शकले रुचाए भने चलचित्र क्षेत्रको लागि खुशीको कुरा हो।