काठमाडौं : रमेश एमके पौडेलको डेव्यू निर्देशनमा तयार भएको चलचित्र ‘तिम्रो मेरो साथ’को टाइटल गीत रिलिज गरिएको छ। बुधबार निर्माण टिमले ओएसआर डिजिटलको युट्युब च्यानलबाट ‘झिलझिल’ बोलको टाइटल गीत रिलिज गरेको हो।

गीतमा सुगम पोखरेल र मेलिना राइको मेलोडियस आवाज रहेको छ। गीतको शब्द निर्देशक पौडेलले नै लेखका छन् भने संगीत योगेश काजी शाहले गरेका हुन् ।

भिडियोमा यस् चलचित्रका नायक पुष्प खड्का र नायिका साम्राज्ञी आरएल शाहलाई रोमान्टिक अवतारमा देख्न सकिन्छ। त्यसो त, पुष्प र साम्राज्ञीको केमिस्ट्री पनि गजब देखिएको छ भिडियोमा। भिडियोलाई रामजी लामिछाने कोरियोग्राफी गरेका हुन् ।

लभस्टोरी जनरामा आधारित यस् चलचित्रका लेखक एवम् कार्यकारी निर्माता सबिर श्रेष्ठ हुन् । त्यस्तै निर्मातामा पासाङ लामा, अर्नव पौडेल, आर्यन पौडेल रहेका छन् भने सह-निर्माताको रुपमा निरु भण्डारी, अशोक पोखरेल, सुमन पौडेल र सुधिर पराजुली रहेका छन् ।

आर्यन फिल्मस तथा बोधी एचडी अमेरिकाको संयुक्त ब्यानरमा निर्माण गरिएको चलचित्रमा साम्राज्ञी र पुष्पका अलवा सरोज खनाल, सन्दीप क्षेत्री, इमिली लामा लगायतका कलाकारहरुको समेत अभिनय रहेको छ। चलचित्र आगामी पौष २९ गतेबाट प्रदर्शनमा आउँदैछ।

सुभाष भुसाल र योगेश काजीको संगीत चलचित्रमा रहेको छ। केही महिना अघि ‘रुमालै बाटेर’ बोलको गीत निर्माण टिमले रिलिज गरेको थियो। जुन गीतलाई दर्शक स्रोताले निकै रुचाएका छन् ।

चलचित्रलाई शिव ढकालले खिचेका हुन् भने भुपेन्द्र अधिकारीले सम्पादन गरेका छन् । साम्राज्ञी र पुष्पले संगै स्क्रिन सेयर गरेको यो तेस्रो चलचित्र हो।

यस् अघि चलचित्र ‘मंगलम’, र ‘मारुनी’मा साम्राज्ञी र पुष्पले संगै काम गरिसकेका छन् । ‘मारुनी’मा जस्तै ‘तिम्रो मेरो साथ’मा पनि दर्शकले साथ दिने पुष्प र साम्राज्ञीको विश्वास छ। अब दर्शकले यो जोडीलाई ‘तिम्रो मेरो साथ’मा कत्तिको रुचाउने हुन् त्यो त प्रदर्शन पछि नै थाहा होला।