काठमाडौं : नेपाली सांगीतिक क्षेत्रमा सुपर डुपर हिट हुन सफल गीत ‘कालो केशमा रेलिमई’को फिमेल भर्सन रिलिज गरिएको छ। शनिबार काठमाडौंमा एक कार्यक्रमको आयोजना गर्दै केन्द्र मोसन पिक्चर्सले फिमेल भर्सन रिलिज गरेको हो।

फिमेल भर्सनमा सुनिता थेगिमको मेलोडियस आवाज रहेको छ। मेल भर्सनमा भने गायक दिनेश ढकालको आवाज रहेको थियो। गीतमा शब्द अनि संगीत पनि दिनेशकै रहेको छ।

गत वर्ष बजारमा आएको मेल भर्सनले निकै लोकप्रियता पाएको थियो। युवा पुस्ता माझ निकै लोकप्रिय मेल भर्सनको अत्याधिक सफलतापछि फिमेल भर्सन बजारमा ल्याइएको हो।

मेल भर्सन भन्दा झन मेलोडियस लाग्छ फिमेल भर्सन। सुनिताको आवाजले फिमेल भर्सनलाई निकै न्याय दिएको आभाष हुन्छ। अडियोमा निकै मिहेनत गरिएको छ।

त्यसो त, फिमेल भर्सनको अडियोसँगै भिडियो पनि निकै उत्कृष्ट छ। भिडियोमा लोकप्रिय नायिका मिरुना मगर र गणेशमान घले फिचर्ड छन्। एक ड्राइभर र महिला यात्रुबीचको प्रेमलाई कलात्मक तरिकाले भिडियोमा देखाइएको छ।

ड्राइभरको भुमिकामा गणेशमान छन् भने यात्रुको भुमिकामा मिरुनालाई देख्न सकिन्छ। मिरुना र गणेशमानको केमिस्ट्री गजब देखिएको छ भिडियोमा।

भिडियोमा कुनै तामझाम छैन। सरल छ, हेर्दा आँखा शितल पार्छ भिडियोले। भिडियोमा राजेश पुमा राईको कथा र निर्देशन रहेको छ। चित्लाङका विभिन्न स्थानमा आकर्षक लोकेशनसहित उत्सव दाहालले भिडियो खिचेका हुन्। भिडियोलाई विकाश दाहालले सम्पादन गरेका छन् ।

मिरुना र गणेशले यस् अघि पनि सुनिल गिरीको ‘सोल्टीनी क्या राम्री’ बोलको गीतमा स्क्रिन सेयर गरिसकेका छन् । यस् भिडियोमा पनि मिरुना र गणेशको जोडीलाई दर्शकले रुचाउँछन् भन्ने आँकलन गर्न सकिन्छ।