नेपालगन्ज : नेपाली चलचित्रका लोकप्रिय अभिनेता दयाहाङ राई यतिबेला नेपालगन्जमा छन् । बिशेष कामले केही दिन अधि अभिनेता राई नेपालगन्ज आएका थिए।
नेपालगन्ज आएको मौकामा दयाले विभिन्न संघसंस्था एवम् व्यक्तिहरुसँग भेटघाट समेत गरिरहेका छन् । यसैबीच, दयाले मंगलबार नेपालगन्जको भेरी अस्पताल भिजिट गरे।
भेरी अस्पताल प्रशासनले दयालाई विशेष निमन्त्रणा गरेको थियो। सोही अनुरुप दयाले अस्पताल भिजिट गर्नुको साथै डायनामिक क्युआरको सेवा समेत लिएका छन् ।
मंगलबारबाट भेरी अस्पतालले पहिलोपटक ‘डायनामिक क्युआर’बाट भुक्तानी सेवाको सुचारु गरेको हो। यही सेवाको दयाहाङ राइद्वारा सुरुवात गरिएको हो। पहिलो ग्राहक बनेर दयाले यो सेवाको उपयोग गरेका हुन् ।
भेरी अस्पतालमा अब क्युआर स्क्यान गरी भुक्तानी गर्न सकिनेछ । कुनै पनि मोबाइल बैंकिङ र पेमेन्ट गेटवे (इसेवा र खल्ती आदि) स्क्यान गरी बिरामीहरुले सजिलै भुक्तानी गर्न सक्नेछन् ।
डायनामिक क्युआर राखिएको हुँदा अब बिलको रकम सजिलै स्क्यान गरी भुक्तानी गर्न सकिने र ठूलो रकम तिर्न समस्या हुने, खुद्रा लिन र दिने झन्झट पनि नहुने अस्पताल प्रशासनले जनाएको छ।
