काठमाडौं : यतिबेला नेपाली कलाकारहरुलाई चुनावको प्रचारप्रसार गर्नमा भ्याइनभ्याई छ। आगामी मंसिर ४ गते हुन गईरहेको प्रदेश तथा प्रतिनिधि सभाको निर्वाचनमा कोही कलाकार उम्मेदवारमा उठेका छन् त कोही कलाकार उम्मेदवारका सहयोगीको रुपमा छन् ।
त्यसो त, निर्वाचनको लागि उम्मेदवारी दिएका कलाकारहरु मतदातामाझ प्रचारप्रसारमै व्यस्त हुने नै भए। तर अन्य कलाकारहरु पनि एकदम व्यस्त देखिएका छन् ।
अधिकांश कलाकारहरु आफुलाई मनपर्ने पार्टीका उम्मेदवारलाई भोट माग्न व्यस्त देखिएका छन् सामाजिक संजालमा। धेरैले फलानो नेतालाई भोट गरौं भन्दै खुलेआम आफ्नो फेसबुक अकाउन्टमा भोट माग्ने गरेमा छन् ।
यसैबीच, पछिल्लो समयका लोकप्रिय नायक प्रदीप खड्काले नेपाली कांग्रेसका नेता गगन थापाको लागि भोट मागेका छन् । उनले गगन थापालाई प्रत्यक्ष भेटेर भोट मागेका हुन् ।
गगनलाई भेटेर प्रदीपले भोट मागेको भिडियो यतिबेला सामाजिक संजलमा भाइरल भइरहेको छ।प्रदीपले भिडियोमा भनेका छन्, ‘दाइमाथि मलाई विश्वास छ। उहाँले भावी प्रधानमन्त्रीको रुपमा जसरी दाबेदारी देखाइरहनुभएको छ, म यसमा विश्वस्त छु। अनि आउनुपर्ने र सम्हाल्नुपर्ने नयाँपुस्ताले नै हो।’
त्यसो त, गगनले पनि प्रदीपलाई तारिफ गरेका छन् । युवा जमातमा प्रदीप निकै सम्भावना बोकेको नायक भएको गगनले भिडियोमा उल्लेख गरेका छन् ।
