काठमाडौं : गत कार्तिक ११ गतेबाट प्रदर्शनमा आएको चलचित्र ‘महापुरुष’ यतिबेला हलमा तेस्रो हप्तामा प्रदर्शनरत छ। तेस्रो हप्तासम्म आइपुग्दा समेत यस् चलचित्र हेर्ने दर्शकको संख्या झन् बढेको छ।

यसैबीच, नेपाली चलचित्रका महानायक राजेश हमालले पनि हलसम्म गएर ‘महापुरुष’ हेरेका छन् । सोमबार काठमाडौंको दरबार सिनेपिलेक्समा महानायकले चलचित्र हेरिसकेपछि उत्कृष्ट रहेको प्रतिक्रिया दिएका थिए।

मिडियाकर्मीसंग बोल्दै महानायक हमालले ‘महापुरुष’को स्क्रिप्ट, कथावस्तु, कलाकारहरुको अभिनय लगायत सबै पक्ष उत्कृष्ट रहेको बताएका थिए।

चलचित्रको सुरुदेखि अन्तिमसम्मको दृश्यले आफुलाई छोएको हमालको भनाई थियो। चलचित्रको अन्तिम क्लाईमेक्स झनै अब्बल रहेको हमालले जनाएका थिए।

साथै, हामी सम्पुर्ण नेपालीको भावना बोकेको कुरा चलचित्रको निकै राम्रो पक्ष भएको पनि हमालले बताए। चलचित्रका निर्देशक एवम् लेखक प्रदीप भट्टराई, निर्माता एवम् कलाकार रबिन्द्र सिङ बानियाँ, नायक अरुन क्षेत्री, नायिका अन्जना बराइलीलाई हमालले खुलेरै तारिफ गरेका थिए।

महानायकले ‘महापुरुष’ हेरेर निकै राम्रो प्रतिक्रिया दिएपछि चलचित्र टिम निकै खुशी भएको छ। त्यसो त, अन्य विशिस्ट ओहदाका व्यक्तिले पनि ‘महापुरुष’ हेरेर निकै राम्रो प्रतिक्रिया सहित तारिफ समेत गरेका छन् ।