नेपालगन्ज : गत कार्तिक ११ गतेबाट प्रदर्शनमा आएको चलचित्र ‘महापुरुष’ आज शुक्रबारबाट तेस्रो सातामा प्रवेश गरेको छ। प्रदर्शनको पहिलो साता भन्दा दोस्रो सातादेखि दर्शकको अत्याधिक साथ पाउन सफल यस् चलचित्रले बक्स अफिसमा समेत राम्रो व्यापार गरेको छ।

तेस्रो सातासम्म आइपुग्दा सम्म चलचित्रले करिब ७ करोड ग्रस कलेक्सन गर्न सफल भएको निर्माण टिमले जनाएको छ। माउथ पब्लिसिटीले गर्दा हलमा चलचित्र हेर्न आउने दर्शकको भिड बढ्दो छ।

अन्य ३ विदेशी चलचित्र हलमा लागिरहेको भएपनि ‘महापुरुष’को क्रेज छुट्टै छ। अधिकांश हलहरु ‘महापुरुष’ले नै कब्जा गरेको छ।

छोराछोरीको खुशीको लागि आफ्नो खुशी एवम् रहर दबाएर राख्ने एक एकल पुरुषको कथामा आधारित यस् चलचित्रका लेखक एवम् निर्देशक प्रदीप भट्टराई हुन् ।

षट्कोण आर्ट्स प्रा.लि.को ब्यानरमा निर्मित फिल्ममा कार्यकारी निर्माता रवीन्द्रसिंह बानियाँ हुन् भने निर्माता दिपेश खत्री छन् ।

चलचित्रमा हरिवंश आचार्य, मदनकृष्ण श्रेष्ठ, गौरी मल्ल, रविन्द्र सिंह बानिया, अरुन क्षेत्री, अन्जना बराइली, राजाराम पौडेल लगायतका कलाकारहरुको अभिनय रहेको छ।